FFK ta Selebrá Dia Internshonal di Hende Muhe ku e Apertura di Kampionato di Dama 2018

WILLEMSTAD — Manera ya ta konosí, mañan 8 di mart mundu ta selebrá dia internashonal di hende muhé. FFK den kolaborashon ku SUBT tambe lo selebrá e dia spesial aki dor di duna inisio na e kampionato di dama netamente riba e dia dediká na e ser muhé. Esaki ku e meta pa duna un realse na tur nos dama nan ku ta práktika futbòl aki na Kòrsou.

E apertura aki lo tuma lugá na Stadion Dr. Antoine Maduro pa 7’or di anochi i durane e partido inisial, e ekipo di SUBT lo enfrentá Inter Willemstad.

Kampionato di dama 2018 lo konta ku partisipashon di 8 tim kual ta:

  1. Hubentut Fortuna
  2. Inter Willemstad
  3. Vesta
  4. Rio Magdalena
  5. SUBT
  6. Sithoc
  7. Jong Holland
  8. Victory Queens

E ekipo nan aki lo bai enfrentá otro tur wikènt durante e partidonan di dama ku lo kontinuá próksimamente.

E komishon di dama ku a keda instalá resientemente ta trahando duru huntu ku e ekiponan di dama pa mira kon por promové futbòl di dama den nos pueblo. E meta di e komishon aki ta pa stimulá mas dama pa djòin un ekipo i kuminsá práktika futbòl. E aña aki, mes kos ku aña pasa, nos lo tin algun selekshon di dama ku lo bai representá nos den eksterior. Aktualmente e selekshon di dama U-15 ta den preparashon pa un kampionato internashonal ku nan lo mester partisipá na dje proksimamente. Pues trabou nan ta sigui tuma lugá pa desaroyo di futbòl di dama aki na Kòrsou. Tur esaki, parti di un plan ku e komishon di dama a traha ku lo keda implimentá durante e aña nan binidero na bienestar di futbòl pa dama.

Pa abo dama ku ke práktika futbòl, bishitá nos página di Facebook; Curacao Woman Football òf Federashon Futbòl Kòrsou i haña tur informashon tokante e ekiponan di dama ku tin aktualmente.

Un invitashon ta bai na henter e pueblo di Kòrsou pa bin Stadion Dr.Antoine Maduro mañan anochi 7’or pa bin selebrá dia internashonal di hende muhé, disfrutá di bo deporte prefrí i mira kiko tur nos dama nan tin aden!

Kòrda ku entrada ta kompletamente grátis!

FFK i SUBT ta warda bo!