WILLEMSTAD — Manera ta konosí, algun dia pasá, e selekshon di Kòrsou su ‘Little League’ beisbòl, a titulá kampion latino amerikano. Komo parti di gradisimentu i selebrá e echo aki, awe djabièrnè lo organisá un tremendo parda pa e hóbennan di Little i tambe esunan di Minor. E karavana lo sali Sambil pa 4’or atardi i lo bolbe bèk pa 6:30, unda e muchanan di e respektivo selekshonnan lo tin e oportunidat pa bai wak i disfrutá di un pelíkula pa kortesia di Cinemark. Durante di e e ruta e hóbennan lo haña trit di General Catering ku ta prepará su delisioso pasapalunan.
E ruta ta kore di e siguiente forma:
Sali Sambil i subi EEG rumbo pa rotònde na Juliana Dorp i subi Jan Noorduijnweg kore te na final pa despues subi Rooseveltweg i drenta W. Churchillweg bai pasa via Rio Canario, Biesheuvel, rotònde Juancho Evertsz (zuikertuin) bai Saliña. Punda, Sali Punda bai bek Saliña i bai Caracasbaai unda lo stòp pa 20 minüt. Despues ta bin bèk abou pa subi Sta Rosaweg, Gosieweg, Schottegatweg, Otrabanda, Rooseveltweg i bai finalisá na Sambil. Nos ta spera ku un i tur por sali i para kantu di kaminda pa kuminda nos hóbennan i laga nan sinti ku nan ta nos héroenan.