Author: E. Evertsz

Posted on

Resultado Bola 8

WILLEMSTAD — Federashon Biyar Korsou wikent ultimo, dianan 30 di april y prome di mei , a organisa otro evento ku a konta ku partisipashon di 27 biyardista. E biaha tabata turno di e disiplina di bola 8 .

Bon partidonan , jena ku tirunan eksepshonal a keda presenta pa e fanatikonan ku tabata presente. Den e ultimo partidonan di e buelta di ganador , Gio Ariza a kai vensi kontra Gemajel Rol ku skor di 6 pa 5 y Fauzi Halaby ta gana Sybren Boekhoudt 6 pa 4.

Den e prome partido di semifinal Rol ta gana Halaby 6 pa 4 y pasa pa final. Den buelta di perdedor Fauzi Halabi ta bini duru bek y ta sali viktorioso kontra Boekhoudt ku skor di 6 pa 3 y pasa pa final. Den e partido final Halaby a bin pa tuma revancha kontra di Rol y ta duna tremendo partido y ta bai ku e titulo , skor final 7 pa 3.

E evento aki tabata patrosina pa Montana Bierhuis y House of Billiard Play. Aki ta sigi e resultadonan ofishal. Empata na puesto 5 Michael Arvelo y Gio Ariza , puesto 4 Jeffrey Nieuwenhuijzen , puesto 3 Sybren Boekhoudt , supkampion Gemajel Rol y kampion Fauzi Halaby . Pa e fin di luna aki Febiko tin programa e disiplina di bola.

Posted on

Royal Scorpions ta Yega na Akuerdo ku Frensly Leito

WILLEMSTAD — Awe nos ta presenta na boso nos fanatiko nan di Royal Scorpions i beisbol en general un parti mas di nos puzzle pa kaba di kompleta e team ku nos a bin ta forma pa asina nos lo por kompeti den e kampionato di liga Dobel A di FEBEKO.

Frensly Leito, djis menshonando su nomber so mi kurpa ta kue kippevel. Manera hopi sa kaba Frensly tabata tin liga Dobel A domina temporado ku e tabata forma parti di Marchena Braves i tambe kon bon trabou e la hasi partisipando den Selekshon di Korsou anja pasa na e torneo di Caribbean Cup, kaminda ku Korsou a gana e titulo maximo i laga nos no keda sin menshona e hazanja ku Frensly ta hasiendo na e momentu nan aki na College aya na Merka, kaminda e ta kibrando record nan di skol den area picheo.

Pa nos di Royal Scorpion ta un plaser enorme di por tine komo parti di nos organisashon i nos por sigura nos fanatikada ku nos ta kasi kla pa temporada 2022.

Posted on

Nos Selekshon Nashonal Femenino U-17 Lo Partisipá Na Segundo Buèlta Di E Concacaf Women’s U-17 Championship Ku Lo Tuma Lugá 30 Aprel Na Repúblika Dominikana

WILLEMSTAD — Aña pasá nos selekshon nashonal femenino kategoria U-17 a terminá komo number 1 den su pul i a klasifiká pa e segundo buèlta di e CONCACAF Women’s U-17 Championship. P’esei nos selekshon ta rumbo pa Repúblika Dominikana pa enfrentá sea Merka òf Costa Rica (dependiendo di nan resultado awe) durante nos kompromiso di e segundo buèlta di a kampionato aki. Nos partido lo tuma lugá 30 di aprel pa 4’or di atardi den Stadion Cristóbal Panamerican aya na Repúblika Dominikana.

Nos selekshon di dama kategoria U-17 ya tin algun siman ta preparando i ta praktiká pa saka kara di Kòrsou un biaha mas. Un grupo di 19 hungadó ta forma parti di nos selekshon nashonal femenino kategoria U-17. E hungadónan aki ta hungadónan aktivo den Kampionato Femenino pero tambe tin 2 hungadó residensiá na Hulanda i Boneiru ku a bin pa reforsá nos selekshon.

E selekshon a wòrdu dirigí pa Sr. Reynold Mercera ku ta wòrdu asistí pa

Sr. Heinrich Roojer komo asistente tékniko i Sr. Pablo Mark Alomá komo entrenadó di portero. Sra. Dianne Winklaar huntu ku Sra. Denice Linger Berggraaf ta e masahistanan miéntras dòkter Eartha Helstone tambe ta kompañá e selekshon.

E hefe di delegashon ta Sra. Fabi Constansia, miembro di direktiva di FFK.

E siguiente hungadónan ta forma parti di nos selekshon;

    1. Rushaviana Petronilia (Jong Holland)
    2. Deyanisha Dorcas (Hubentut Fortuna)
    3. Charnainelys Andrea (Vesta)
    4. Julainy Fanijten Thielman (Wishi Marchena)
    5. Gervionna Martina (Jong Colombia)
    6. Ludmarie Flaneur (Xerxes DZB, Hulanda)
    7. Lygaira Pieters (Atletico Tera Cora, Boneiru)
    8. Raëngely Keller (Excellence School)
    9. Queen-Jelly Alexandre (Vesta)
    10. Gionella Calvenhoven (Vesta)
    11. Soerianieh Nucatia (Excellence School)
    12. Kaaisha Constansia (Excellence School)
    13. Kishana Mathilda (Jong Holland)
    14. Aukje Moerdijk (Inter Willemstad)
    15. Queennaily Geertruida (Jong Holland)
    16. Caelyn Hodge (Excellence School)
    17. Kyra Martie (Excellence School)
    18. Lisa Pasman (Excellence School)
    19. Shoniqca Olaria (Excellence School)

Preparashonnan ta kanando den ful swing pa nos damanan ku lo biaha próksimamente pa Repúblika Dominikana pa nos kompromiso durante e segundo buèlta di e CONCACAF Women’s U-17 Championship.

Posted on

3 Entrenadó Femenino Di Kòrsou a Biaha pa Boneiru pa Partisipá na e UEFA Assist Dutch Caribbean 2022

WILLEMSTAD — Tur aña KNVB ku UEFA ta brinda oportunidat na entrenadónan femenino di Sürnam, Aruba, Boneiru, Kòrsou i Sint Maarten pa siguí kursonan pa siguí desaroyá nan abilidatnan futbolístiko. E biaha aki FFB ta tin e oportunidat pa organisá UEFA Assist Dutch Caribbean 2022 ku a tuma lugá di 16 pa 23 di aprel. Rignalda Hooi, Merrydiën Martina i Suryli Ipcedencia a biaha pa Boneiru pa partisipá na e kurso aki ku e meta pa ampliá nan konosementu di futbòl i pone den praktiká tur loke nan a siña pa engrandesé futbòl femenino aki na Kòrsou.

E kurso aki a tuma lugá di mainta pa atardi na un skol na Rincon i e tabata repartí den 2 parti. Parti mainta tur kursista tabata haña e parti teorétiko ku presentashonnan di Powerpoint. Parti atardi ta tin e parti práktiko ku un grupo di 49 hungadó femenino di Boneiru entre 9 pa 13 aña ku tambe a partisipá na e kurso p’asina pone den praktiká loke a duna durante e kurso. Tambe nan mester a hasi diferente tareanan den grupo i por último organisá un torneo, harma vèlt, analisá trainingnan i duna puntuashon na e hungadónan abase di nan prestashon.

Un total di 20 kursista a partisipá na e kurso aki ku a resultá un éksito.

Tur e kursistanan tabata di opinion ku e kurso tabata hopi interesante i bon hinká den otro pasó despues di e parti teorétiko, nan tabata pone den práktika tur loke nan a siña, riba e mesun dia pa despues evaluá e kosnan ku a bai ménos bon. Tambe tabata algu hopi grandi pa por a konosé e legendario Johan Neeskens personal i a tuma lès serka 2 di e mihó entrenadónan na Hulanda ku ta Henriette de Reus i Corina Dekker.

Pues nan ta tin un eksperensia úniko i hopi informativo.

Awor futbòl femenino ta konta ku 3 entrenadó bon prepará pa siguí desaroyá nos damanan i yuda engrandesé futbòl femenino aki na Kòrsou.

FFK ta felisitá tur e entrenadónan aki ku nan diploma di UEFA Assist Dutch Caribbean 2022!

Posted on

Miguel Ramos a domina torneo di ahedres sin mustra kompashon den su prome aña ofisial komo hubenil

WILLEMSTAD — Djadumingu 24 di aprel 2022, ‘Curacao Youth Chess Institute’ a organisá su torneo anual di ahedres e biaha aki pa e kategoria hubenil. E kategoria hubenil (óf U18) ta konsisti di hobenan ahedresista ku durante aña 2022 ta kumpli 18 aña di edat of menos.

E talento Miguel Ramos kende lo bai kumpli 13 aña den 2022 a demonstra su habilidatnan ku ela desaroya atraves di tempu i logra derota tur 5 kontrinkante ku ela enfrenta.

Miguel Ramos a kaba e torneo ku un skor perfekto ounke ta tin diferente ahedresista fuerte entre e 22 partisipantenan. Na di dos i di tres luga a termina Dylan Léañez i Dianthely Pourier tur dos ku kuater punto. Ta bon pa menshona ku Daniel Léañez tambe a skor 4 punto, pero e programa di pareo digital a indika ku basa riba punto di resistensia Daniel a keda na di kuater luga.

E hoben ahedresistanan a bataya fuerte durante weganan sumamente interesante i e skornan a resulta hopi perta, mirando ku e diferensia entre e puesto nr. 2 puesto i e finalista nr. 11 ta solamente 1 punto. E resultadonan final tabata lo siguiente.

Ganadónan di trofeo ‘Overall’:

  1. Miguel Ramos    5 punto
  2. Dylan Léañez    4 punto
  3. Dianthely Pourier    4 punto

Ganadónan di medaya den kategorianan di edat:

  • U14    Miguel Ramos
  • U16    Dylan Léañez
  • U18    Gabrielle Winklaar

Curacao Youth Chess Institute ta satisfecho kon e torneo hubenil a kana i ta anima tur ahedresista hoben pa prepara pa e proksimo evento ku ta e torneo eskolar 5 di yuni binidero.

Posted on

Arjun Huerta ta Firma ku Royal Scorpions

WILLEMSTAD — Manera grandi nan ta bisa priminti ta debe i Royal Scorpions sigur lo soru di kumpli ku tur loke e priminti. Pesei awe nos ta presenta na boso nos fanatiko nan otro gran prospekto di Korsou ku a firma ku nos.

Awe nos ta presenta na boso Arjun Huerta. Arjun sigur no ta deskonosi pa pueblo di Korsou i sigur no pa siguido nan di Béisbol, mirando ku for edad nan yong Arjun a bin ta forma parti di selekshon di pariba i den varios liga di Little League. Aktualmente Arjun ta sakando kara di Korsou, den divishon 1 di college aya na Merka. Pero komo su kurason ta bati pa Korsou, Arjun a asepta pa join nos organisashon den e kampionato di liga Dobel A di FEBEKO.

Nos sigur ta sumamente orguyoso di por tin Arjun den nos organisashon i ta ansioso pa ku e kampionato aki.

Nos ke invita tur fanatiko i miembro di Royal Scorpions pa sigui nos riba nos red nan social i keda pendiente pa mas informashon, anunsio i varios tremendo aktividat ku tin den tapara pa tur fanatiko i miembro.

Posted on

A inisiá ku mantenshon na mastnan di iluminashon den Tio Daou

WILLEMSTAD — Ta ku grato plaser nos por anunsiá ku e mantenshon di tantu e mastnan komo e sistema di iluminashon den Tio Daou Ballpark a inisiá.

Ta trata aki di un total di 6 mast di iluminashon di entre 24 i 27 meter ku lo risibí e mantenshon nesesario i di kua lo probechá pa kambia tambe tur e peranan LED ku ta kimá den nan.

E mesun kompania ku a instalá e sistema di iluminashon ta enkargá tambe ku e mantenshon aki ku ta keda realisá kada pasa kuater pa sinku aña.

Ta apliká e sistema di mantenshon aki pa evitá ku e mastnan ta deteriorá demasiado i pone ku mester desmantelá esaki den su totalidat pa por hasi e mantenshon nesesario i konsekuentemente lo hasi e trabounan i e gastunan muchu mas grandi.

Mester remarká ku e trabounan lo ta kla pa e kampionato di beisbòl little league i su serinan di playoff por tuma lugá. Meskos ta konta tambe pa e kampionatonan di beisbòl hubenil, klase A i dòbel A ku lo mira akshon den un sistema di iluminashon kompletamente renobá.

E famoso evento di tur fin di aña ‘baseball week’, ku ta konta ku partisipashon di mayoria di nos  peloteronan profeshonal, tambe ta tuma lugá den Tio Daou Ballpark.

Un primisia tambe ta e echo ku e federashon di beisbòl di Hulanda, KNBSB, tambe ta planiando algun evento relashoná ku e posibel prospektonan i e selekshon di beisbòl di Hulanda ku ta tuma lugá den Tio Daou Ballpark.

Pues sigur lo bira un aña kargá ku basta aktividat atrobe despues di dos aña di no muchu aktividat pa loke ta e deporte di beisbòl. Un danki na tur e patrosinadornan i tambe e boluntarionan ku a i ta dunando un man konstantemente pa nos por mantené Tio Daou Ballpark den óptimo kondishon.

Posted on

Guus Hiddink Direktor Tekniko di Selekshon Nashonal Maskulino

WILLEMSTAD — Manera ya ta konosí den e lunanan benidero nos selekshon nashonal lo tin algun partido sumamente importante na kaminda. Despues ku nos selekshon ta tin algun luna inaktivo, direktiva di Federashon Futbòl Kòrsou huntu ku e departamento tékniko a bin ta traha duru p’asina yega na un kuerpo tékniko pa dirigí nos selekshon nashonal durante nos próksimo kompromisonan.

Durante vários dia di entrevista ku diferente kandidato ku hopi potensial pa bira e próksimo direktor tékniko di nos selekshon nashonal, FFK a yega na e siguiente konstelashon ku lo dirigí nos selekshon durante nos próksimo kompromisonan.

Kuerpo tékniko
Sr. Guus Hiddink Direktor tékniko
Sr. Art Langeler ‘Bonds coach’
Sr. Gillian Justiana ‘Assistant coach’
Sr. Gersinio Constansia ‘Assistant coach’
Sr. Quentin Jakoba ‘Assistant coach’
Posted on

Di 4 Edishon di The Eagles Championship

WILLEMSTAD — Den fin di siman ku ta tras di lomba klup di atletismo The Eagles, den estrecho kooperashon ku Curaçaose Atletiek Bond (CAB), a organisá su di 4 edishon di kareda di pista na stadion Ergilio Hato titulá “The Eagles Championship”. Un kantidat grandi di 190 atleta di 8 klup di atletismo a kompetí den e evento grandi aki. Mayoria atleta tabata di Kòrsou pero tabatin partisipashon individual tambe di tres atleta di Bèlgika i un atleta di Boneiru.

The Eagles por mira bèk riba un kompetensia sumamente eksitoso, ku 9 rèkert nashonal nobo den atletismo di atletanan di diferente klup. Asina The Eagles huntu CAB ta siguí engrandesé e deporte di atletismo na Kòrsou, ku bon yudansa di boluntarionan i spònsernan di e evento (RBC i Sportspot Sta. Maria). The Eagles ta gradisí CAB i tur spònser, boluntario, ofisialnan, atleta i klup pa nan partisipashon i kontribushon kual tabata hopi importante pa e kompetensia aki bira un éksito. Entre e boluntarionan tabatin mayornan di atletanan i Brigada di Siguridat kualnan a hasi un hopi bon trabou.

The Eagles mes a disfrutá di un tremendo prestashon di su mes atletanan ku a gana 30 medaya en total durante e evento. Entre esakinan tin Jeronn-Jeevan Tilé ku a destaká ku 5 medaya di oro i ku a kibra 3 rèkert nashonal di U11. Zion Sambo (U15) tambe a gana 3 medaya di oro. Aldrich Jack (Senioren), Tyler Otto (U17) i Rivka Goede (U17) a gana 2 medaya di oro kada unu den eventonan ku tabatin 3 atleta of mas kompetiendo. Tambe tabatin medaya di oro pa Elgemar Laker i Milicent Lauffer. The Eagles ta felisitá tur su atletanan pa nan partisipashon i prestashon, tantu esnan ku a gana medaya komo esnan ku no a gana medaya.

Facebook Twitter Instagram Youtube
© 2022 Deporte Awe. Tur derechi reservá. Diseñá pa E² Media.