WILLEMSTAD — Direktiva di Federashon Tenis di Mesa Kòrsou (FTMK) ta informá di su promé torneo ofisial di temporada 2026 den kuadro di selebrashon 70 aña eksistensia di nos federashon kual ta e torneo na memoria di e legendario Robert Hose.
E torneo ta tuma lugá di 6 pa 9 di febrüari benidero den Sala di rekreo Irene Moreno. Ya nos tin mas ku 50 inskripshon pa e torneo den e kategorianan infantil, hubenil, open, 50, 60 i 70 plùs.
Mester remarká ku lo bai tin hungadónan di Aruba, Boneiru, St. Maarten, Hulanda i di Kòrsou lógikamente.
Tuma nota ku e inskripshon ta sera djabièrnè 23 di yanüari. Por inskribí serka Franklin Mathilda na tel: 511 0005. Tur partisipante ta bon bini.
E torneo ta kuminsá ku kategoria ‘Open’ riba djabièrnè 6 febrüari pa 7’or anochi, siguí djasabra mainta pa 9.30 ku e kategorianan infantil i hubenil, miéntras ku djasabra anochi pa 7.30 ta tuma lugá e kompetensia nan den e kategorianan 50, 60 i 70 plùs. Tur wega ta tuma lugá den sala di rekreo Irene Moreno.