WILLEMSTAD — Manera ya ta konosí, nos selekshon nashonal a klasifiká invikto pa e terser buèlta di Scotiabank Caribbean Cup na yüni último. Nos a kaba na kabes di nos pul i huntu ku Jamaica, Trinidat i Haiti nos ta forma e 4 kabesante nan di e pulnan. Nos pul, kual ta pul 4, ta konsistí di e siguiente paisnan; Antigua & Barbuda, Puerto Rico i Kòrsou.
Awor aki nos selekshon nashonal tin partidonan sumamente importante na kaminda durante e terser buèlta di e Scotiabank Caribbean Cup. Si nos sali number un di nos pul, nos lo klasifiká direktamente pa Gold Cup ku por wòrdu konsiderá manera Euro Cup òf Kopa Amerika pero pa Karibe, Norte i Sentro Amerika. E 3 mihó segundo finalistanan lo kompetí ku otro den luna di novèmber 2016 i e ganadó lo okupa e di 5 puesto, kual ta e último puesto pa un pais di Karibe klasifiká pa hunga un wega di deskite ku e pais ku sali di 5 luga de Sentro Amerika, pa un di nan ku por klasifiká pa Golden Cup. E final di Scotiabank Caribbean Cup lo tuma lugá na komienso di yüni 2017 (kalendario di FIFA). Gold Cup 2017 lo tuma lugá den luna di yüli na Merka i esaki ta un evento grandi ku lo konta ku kobertura mundial.
Según informashonnan e selekshon tentativo pa Kòrsou den e terser buelta di Scotiabank Caribbean Cup ta lo sigiuente:
- Eloy Room (Vitesse/Hulanda)
- Rowendy Sumter (Scherpenheuvel/Kòrsou)
- Jarzinho Pieter (Centro Dominguitu/Kòrsou)
- Rhu-endy ‘Cuco’ Martina (Southampton/Inglatera)
- Germaine ‘Kemy’ Agustien (FC Dordrecht/Hulanda)
- Jarchinio Antonia (Go Ahead Eagles/Hulanda)
- Leandro Bacuna (Aston Villa/Inglatera)
- Shanon ‘Cheese’ Carmelia (Ijsselmeervogels/Hulanda)
- Elson ‘Sontje’ Hooi (Ermis Aradippou/Chipre)
- Rangelo Janga (AS Trencin/Slovakia)
- Gillian Justiana (Helmond Sport/Hulanda)
- Gino van Kessel (Slavia Praag/Repúblika Cheko)
- Darryl Lachman (Willem II/Hulanda)
- Gevaro Nepomuceno (CS Maritimo/Portugal)
- Jeremy De Nooijer (Levski Sofia/Bulgaria)
- Ayrton Statie (FC Oss/Hulanda)
- Doriano Kortstam (Roda JC/Hulanda)
- Michael Maria*
- Dustley Mulder*
- Felitciano Zschusschen*
Djaluna 3 di òktober nos hungadónan residensiá aya na Hulanda lo yega Kòrsou p’asina djòin nos hungadónan lokal pa sigui ku e trainingnan i preparashonnan pa nos promé enkuentro di e terser buèlta di Scotiabank Caribbean Cup. E partido aki lo tuma lugá djarason 5 di òktober den Stadion Ergilio Hato 8’or di anochi i nos lo enfrentá Antigua & Barbuda. Djadumingu 9 di òktober nos selekshon lo sali pa Puero Rico kaminda dia 10, nan lo entrená pa dia 11 di òktober e segundo partido tuma lugá kontra e ekipo amfitrion, Puerto Rico.
Pronto karchinan pa e partido aki lo ta na benta i ta optenibel na FFK bou di ora di ofisina, Botika Mampuritu, Beep Beep, 4th of July Snèk na Barber, pòmp di gasolin Santa Maria i na tur filial di C-Post N.V.
E preisnan pa e diferente paketenan pa sekshonnan ta lo siguiente:
- VIP ta kosta Fl.250,- (konsumo inkluí);
- Bou di tribuna kubrí ta Fl.75,-
- Bou di tribuna kubrí parti Festival Center ta Fl.50,-
- Tribuna no kubrí ta Fl.25,-
- Den e sekshon di tribuna no kubrí mucha te ku 12 aña i 60+ ta paga Fl.15,-
Ahinda tin mas suèter di nos selekshon nashonal ku shal optenibel na FFK bou di ora di ofisna na balor di 35 ku 25 florin. Pasa buska di bo pa asina bo bin sostené i apoya nos hungadónan.
Tambe FFK kier anunsiá ku próksimamente lo tuma lugá aki na Kòrsou e Final di CFU pa Mundial di FIFA kategoria U-20. Esaki lo ta di 21 pa 30 di òktober i lo konta ku partisipashon di 8 pais. Mas detaye di e gran evento aki lo wòrdu anunsiá despues.
Reservá djarason 5 di òktober pa bo ta den Stadion Ergilio Hato komo e number 12 sosteniendo nos selekshon nashonal.