MERKA — Ozhaino Albies di Rome Braves a keda selekshoná pa partisipá den e All-Star Futures Game 2015. E partido aki lo tuma luga dia 12 yüli próksimo na Great American Ball Park na Cincinnati. Ozhaino lo representá Kòrsou riba e roster di e All-Starnan di Mundu ku lo enfrentá e All-Starnan di Merka.
E roster di e All-Starnan di Mundu ta konsistí di peloteronan di shete diferente pais i teritorio pafó di Merka. Repúblika Dominikana ta keda representá pa 13 pelotero, siguí pa Venezuela ku 5 i Puerto Rico ku 3. Kòrsou, Alemania i Taiwan tin un representante kada un riba e ekipo di Mundu.
Den pasado, Jonathan Schoop(2011), Juan Carlos Sulbaran(2009), Jurickson Profar(2011-2012), Shairon Martis(2008), Wladimir Balentien(2006-2007) a representá Kòrsou den e All-Star Futures Game.