WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan den Stadion Antoine Maduro (SUBT). Riba djabièrnè tabata e ekipo di Centro Dominguito ku a enfrentá Sithoc. Akinan tabata Centro Dominguito ku a bai ku e viktoria ora ku nan a gana Sithoc ku skor di 2-0.
Riba djasabra tabata tin dos partido. Den e promé partido tabata e ekipo di UNDEBA ku a enfrentá Hubentut Fortuna. Den e partido aki ambos ekipo a logra bai kas ku un punto despues di a empatá na un gol pa banda.
Den e di dos partido di djasabra tabata e ekipo di Jong Holland ku a topa ku e ekipo di Jong Colombia. Akinan tabata Jong Holland ku a sali for di e porta grandi derotando Jong Colombia ku skor di 5-1.
Por ultimo, riba djadumingu tabata tin e partido entre Centro Barber i SUBT. Akinan tabata Centro Barber kua logra e viktoria despues di a golia SUBT ku skor di 7-1.
Liga MCB ta kontinuá awe nochi ku otro partido den Stadion Antoine Maduro (SUBT). Awe nochi mitar di nuebe e ekipo di Victory Boys lo enfrentá Scherpenheuvel.