WILLEMSTAD — E kampionato di futbol prome divishon Liga MCB a kontinua den wikent tras di lomba ku partidonan na Stadion Antoine Maduro i na Stadion Ergilio Hato. Riba djabierne tabata e ekipo di Centro Barber ku a enfrenta Jong Holland na Stadion Antione Maduro. Akinan ambos ekipo a anota un gol i asina aki parti e puntonan. Pa Barber e gol Jurensley Martina, mientras ku pa Jong Holland tabata Nathan Martina.
Riba djasabra tabata tin dos partido den Stadion Ergilio Hato. Den e prome partido Hubentut Fortuna a derota Sithoc ku skor di 3-1. Pa Hubentut Fortuna e golnan a keda anota pa Oscar Molina, Luis Miranda i Shurwendel Roosje. E uniko pa Sithco a keda anota pa Rowendley Poppen.
Den e di dos partido di djasabra tabata UNDEBA ku Scherpenheuvel ku a hasi bon ku otro empatando na un gol. UNDEBA a bin di patras despues ku te na komienso di e di dos mitar Scherpenheuvel tabata ariba. Pa UNDEBA e gol a keda anota pa Jimbertson Vapor, mientras ku Jesely Corasol a anota pa Scherpenheuvel.
Riba djadumingu, Centro Dominguito a enfrenta Victory Boys den e prome partido. Den e partido aki tabata Centro Dominguito ku a bai ku e viktoria, derotando Vicotry Boys ku skor di 2-1. Pa Dominguito ambos gol a keda anota pa Ashar Bernardus, mientras ku Norman Hoyer a anota pa Vicotry Boys.
Den e ultimo partido pa wikent aki, SUBT a topa ku Jong Colombia. Akinan tabata Jong Colombia ku meskos ku den e partido anterior ta gana ku skor di 2-1 di SUBT. Pa Jong Colombia e golnan a keda anota pa Munier Asiendu i Kendrith Poulino. E uniko di SUBT a keda anota pa Christopher Martina.