BARCELONA – E ekipo di futbòl Barcelona FC a duna di konosé ku nan lo apelá e sanshonnan imponé pa FIFA. Esaki a keda anunsiá pa e ekipo den un komunikado. Mas aleu e ekipo a bisa ku nan lo bai e Tribunal di Arbitrahe Deportivo den kaso ku ta nesesario.
FIFA ayera a anunsiá ku nan ta prohibí Barcelona FC pa firma hungadó den e próksimo dos periodonan di kambio di hungadó pa motibu di violashonnan di regla. Ku esaki Barcelona no por firma hungadó den e periodo di yüli pa ougùstùs próksimo, tampoko e periodo di yanüari pa febrüari di 2015. Segun FIFA e ekipo Spañó a viola reglanan ku ta regulá firmamentu i kambionan di hungadónan bou di 18 aña di edat. Banda di esaki tambe Barcelona a haña un multa di $509.000 dòler. E ekipo a haña 90 dia pa regulá e situashon di tur hungadó menor di edat ku e la firma.