SARASOTA, FLORIDA – E manager di e ekipo di Baltimore Orioles, Buck Showalter a papia riba e posibilidat nan ku tin pa Jonathan Schoop habri temporada den Liga Grandi ku e ekipo di Baltimore.
Un pregunta ku e keda hasi na e manager di e ekipo ta; si Jonathan Schoop por forsa su kaminda den e aliniashon di Baltimore Orioles pa komienso di temporada.
Riba esaki Showalter a bisa; “ami lo no usa e palabra forsa. Lo mi bisa ku Schoop ta kompetiendo pa un trabou i no tin niun hende su dilanti ni niun hende su tras. Ta muchu trempan pa bisa esaki. Loke mi por bisa ku sertesa ta, ku e kaminda ku Schoop ta bai habri e temporada, sea ta ariba of abou no ta skirbi pretu riba blanku. De fakto, nos a sigurá ku e pelotero ta na altura di esaki.”
Den desèmber di aña pasa e Vise Presidente di Baltimore Orioles, Dan Duquette a bisa ku e ta preferá pa Jonathan Schoop kuminsá e temporada den Tripel A. Na opinion di Duquette, Jonathan por probechá di un tiki mas eksperensia promé ku e wòrdu yama komo hungadó di tur dia den Liga Grandi.
Jonathan mes no tin problema unda e kuminsá e temporada 2014. Segun e pelotero su meta prinsipal ta pa yega Liga Grandi i esei por ta den aprel of despues. “Loke sea ku pasa, ami ke hunga beisbòl,” Schoop a bisa. “Si mi kuminsá den Tripel A, mi ta traha duru pa yega Liga Grandi i si mi kuminsá den Liga Grandi mi ta hasi mi best pa mi keda ei nan.”