WILLEMSTAD – Futbòl Liga MCB a kontinuá den wikènt tras di lomba ku sinku partido. Djabièrnè anochi 11 di aprel tabata tin e promé partido ora ku Hubentut Fortuna a topa ku Centro Barber. E partido aki a terminá den un empate na tres gol.
Djasabra 12 di aprel tabata tin dos partido. Den e promé partido entre Victory Boys i Jong Colombia tabata Victory Boys ku a sa di sali di e porta grandi, derotando Jong Colombia ku skor di 3-0.
Despues di e partido aki e siguí e partido entre Sithoc i Jong Holland. E partido aki a finalisá ku un viktoria di 2-1 pa Jong Holland.
Riba djadumingu Liga MCB a kontinuá ku dos partido. Den e promé partido SUBT a topa ku UNDEBA. Akinan ambos ekipo a sa di bai kas ku un punto despues di empatá na un gol.
Den e di dos partido di djadumingu, Centro Dominguito a topa ku Vesta. Den e partido aki Centro Dominguito a sa di anotá na kuater okashon pa gana di Vesta ku skor di 4-0.