WILLEMSTAD – Komishon deportista di luna a publiká su nominado pa e premio di deportista di luna febrüari 2014.
E komishon a yega na e siguiente nominadonan:
1. Aldrich Jack (Atletismo), Aldrich ta un hóben di 13 aña ku apénas medio desèmber 2013 a hasi su entrada den deporte di atletismo, ku e tim The Eagles. Despues di a destaká den desèmber i tambe yanüari, den luna di febrüari Aldrich ta rematá den su kategoria U-15 mucha hòmber. Aldrich Jack ta gana medaya di oro riba sprent 80meter ku tempu di 10:21 sekònde, e la gana oro riba 1.200m ku un tempu 3:52.24 minüt, tambe e la gana oro riba kareda ku opstákulo 80meter ku un tempu di 12.75 sekònde i Aldrich a logra medaya di plata riba e disiplina bula haltu, kaminda e la bula 1.50m. Pa e motibu ariba menshoná Aldrich Jack a keda skohe komo nominado pa deportista di luna febrüari 2014.
2. Henny Metry (Pinpòn), Henny ta un hungadó di pinpòn di basta trayektoria i tabata durante di e torneo ‘Parts For You’ ku e ta logra bai ku e título máksimo. E partido final tabata un espektákulo kompletu. Despues ku Henny ta bai ariba 2-0, Dimirti Leon ta bin bèk pa empatá e partido 2-2. E partido tabata emoshonante kaminda ámbos hungadó a saka tur loke ku nan tabatin aden. Henny den e último sèt a parse di bai kaba fásil ku Dimitri ora e ta tuma un bentaha kómodo di 9-4. Pero Dimitri ta bin bèk ku bon wega di pinpòn pa empatá na 10-10. Ku 2 tremendo smèsh Henny ta bin bira kampeon derotando Dimitri 12-10. Pa e motibunan ya menshoná, Henny Metry a keda skohe komo nominado pa deportista di luna febrüari 2014.
3. Nathaniel Veeris (Body-building), Nathaniel ta un body-builder super dediká ku den luna di febrüari a kompetí den e Arnold Classic Amateur Championship, ku a tuma lugá na Columbus Ohio. Mester remarká ku ta un di e kampionatonan di mas renombre na nivel mundial. Nathaniel a kompetí den e kategoria te ku 90 kilo. E kategoria aki a konta ku e kantidat mas grandi di partisipante (23) durante e kompetensia ariba menshoná i di e 23 partisipantenan aki Nathaniel a logra pasa pa e tòp 6 finalistanan. Tabata un bataya hopi fuerte i Nathaniel a logra e di dos puesto ku ta terser lugá den su kategoria Light Heavy Weight. Pa e motibu ariba menshoná Nathaniel Veeris a keda skohe komo nominado pa deportista di luna febrüari 2014.
E anunsio i premiashon di e ganadó lo tuma lugá:
Fecha: Djasabra 15 Mart 2014
Ora: 18.00 – 19.00’or
Sitio: Rio Lounge & Sports Bar, Chuchubiweg 10?Damacor
Den un ambiente liber di humamentu i liber di alkohòl!
Komishon ta gradisí e siguiente spònsernan ku ta yuda pa e premiashon aki por bira posibel:
CHANGES PRO SPORT – SALAS SPORT SHOP – RIO LOUNGE & SPORTS BAR- MCB – PETRO INDUSTRIAL NV – CSOF – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FUNDASHON NOBO – FFK – COCA COLA – SELIKOR