WILLEMSTAD – Djasabra, 30 di ougùstùs último a tuma lugá e apertura ofisial di e kampaña di FIFA Live Your Goals ku un grandioso festival di futbòl pa damitanan entre 6 pa 12 aña na tereno di FFK. E partisipantenan por a inskribí pa e festival aki via di nan skol òf por a aserka FFK pa asina forma parti di e gran evento aki.
For di den oranan di trempan diferente konvoi a kuminsá transportá e 235 partisipantenan pa FFK pa asina nos por a kuminsá ku e aktividat. Alrededor di 9or di mainta tur e mucha muhénan ku a inskribí pa partisipá na e festival aki tabata kla uniformá pa kuminsá. E dia a habri ku un desfile di nos selekshon nashonal di dama U-15 ku a marcha riba tononan di himno di FIFA i e himno di Kòrsou. Seguidamente Sr, Rignaal ‘Jean’ Fransisca a hiba algun palabra i a yama tur hende bon bini i a gradisí FIFA pa a duna nos e oportunidat pa a kuminsá ku e proyekto grandi aki. Tambe Sr. Gregory Engelbrecht, representante di FIFA/CONCACAF a hiba algun palabra i por último Sra. Liseth Sambo-Velden a hiba palabra na nòmber di Gobièrnu di Kòrsou.
Despues Sr. Engelbrecht, representante di FIFA/CONCACAF a hasi un entrega simbóliko den forma di un saku di bala i material na presidente di FFK i seguidamente nos embahadoranan di LYG; Dianthe Scheepers, Lauryn Richardson i Lidsey Hart a saka e promé bala pa asina e dia kuminsá.
Despues di e parti ofisial nos ta tin un tremendo seshon di zumba pa ‘warm-up’ pa mes ora e festival a ranka sali kaminda tur e muchanan a wòrdu repartí den timnan chikí i tabata hunga kontra otro pa asina sera konosí ku futbòl pa dama.
E meta di e proyekto aki ta pa konsientisá e pueblo riba futbòl pa dama, tambe pa e promoshon di futbòl pa dama i pa atraé mas futbolista femenino pa kuminsá práktika e deporte aki.
Despues di e dia eksitoso aki lo bai tin mas aktividat durante hinter aña. FFK lo bai na diferente skol i brinda trainingnan pa mucha muhénan interesá pa práktika e deporte aki. Dia 28 di sèptèmber binidero lo kuminsá un kompetensia di skol di kategoria U-13. Esaki lo tuma lugá tur djabièrnè tra’i mèrdia na SDK. Mas den transkurso di aña nos lo organisá e di dos festival di LYG i otro aktividatnan di futbòl pa dama. Tur esakinan ta saká for di FFK su plan pa desaroyo duradero di futbòl pa dama (2014-2018) kual ta un plan ku ta wòrdu sostené i ouspisiá pa FIFA.