WILLEMSTAD – Despues di algu mas ku un luna futbòl Liga MCB a kontinuá den wikènt tras di lomba na Stadion Ergilio Hato. Tabata tin sinku partido den wikènt, kuminsando djabièrnè ku e partido entre SUBT i Undeba. Den e partido aki tabata Undeba ku a bai ku e viktoria, ganadó SUBT ku skor di 3-0. Pa Undeba tur tres gol a keda anotá pa Norvianel Naar.
Djasabra e kampionato a sigui ku dos partido. Den e promé partido Centro Barber a duna Centro Dominguito su promé derota di temporada. Barber ku golnan di Ruensley Leuteria (2x) i Kenneth Kunst a gana ku skor di 3-1. E úniko gol di Centro Dominguito a keda anotá pa Ashar Bernardus.
Despues a sigui e partido entre Jong Holland i Victory Boys. Akinan ambos ekipo a disidí di kompartí punto i finalisá e partido no 0 gol.
Riba djadumingu e promé ekiponan ku a mira tabata Hubentut Fortuna i Vesta. Akinan tambe ambos ekipo a hasi bon ku otro i finalisá e partido na 0 gol.
E ultimo partido di e wikènt tras di lomba tabata entre Jong Colombia i Sithoc. Akinan tabata Sithoc ku a sa di bai ku e tres puntonan derotando Jong Colombia ku skor di 3-1. Pa Sithoc e golnan a keda anotá pa Oswin Luciano, Rowendley Poppen i Shurwendell Roosje. E úniko di Jong Colombia a keda anotá pa Clinton Sirvania.