ZURICH – E kampionato Europeo di atletismo a ranka sali ayera i riba mesun dia tantu Liemarvin Bonevacia komo Churandy Martina a kompetí. Ku un tempu di 45.65 sekònde Liemarvin a sali na di dos lugá den su seri di 400m. Esaki tabata sufisiente pa pone Liemarvin den e semifinal awe mèrdia. Liemarvin su tempu tabata e di kuater mihó tempu ku e keda registrá ayera riba 400m.
Churandy Martina a kore e distansia di 100m ayera. Akinan, Churandy a logra yega na di dos lugá den su seri ku un tempu di 10.31 sekònde. Esaki tambe tabata sufisiente pa pone Churandy den e semifinal awe mèrdia. Pa Churandy su tempu tabata e di nuebe mihó tempu ku a keda registrá ayera riba 100m.
Ainda e federashon di atletismo Hulandes no a duna di konosé e kuater koredónan ku lo forma parti di nan ekiponan di relevo. Pero e ekipo di 4x100m ta konta ku seis atleta tentativo for di kua Churandy Martina i Hensley Paulina. Den e ekipo di relevo 4x400m tin sinku atleta for di kua Liemarvin Bonevacia, Terrence Agard i Obed Martis.
E kompetensianan di relevo lo tuma lugá djasabra i djadumingu próksimo.
Kareda di 400m Liemarvin Bonevacia
Kareda di 100m Churandy Martina
Entrevista ku Churandy Martina despues di a kore 100m