SAINT LUCIA – Ayera e selekshon nashonal di Kòrsou U-17 a hunga su promé partido den e klasifikatorio pa Mundial di Futbòl U-17 na Chile otro aña. Den e partido aki e selekshon di Kòrsou a enfrentá e selekshon di kas kual ta St. Lucia. Akinan e selekshon Kurasoleño a kai chikí ora ku nan a pèrdè ku skor di 4-2 di St. Lucia.
For di e promé mitar di e partido e selekshon di Kòrsou a kai atras ku skor di 4-0. Den di dos mitar di e partido Kòrsou a lucha pa bin bek anotando dos gol. Lastimámente, ku e bentaha di St. Lucia tabata muchu grandi i e selekshon di Kòrsou a kai chikí ku e skor ya menshoná di 4-2. Pa e selekshon di Kòrsou e golnan a keda anotá pa Kevin Lodovica i Sherendric Fransinet.
E siguiente partido pa e selekshon di Kòrsou lo ta mañan djabièrnè dia 22 di ougùstùs kontra di e ekipo di Trinidad i Tobago. Trinidad i Tobago tambe a hunga nan promé partido ayera kontra Grenada i a gana esaki ku skor di 2-0.
Skema di próksimo partidonan:
22 ougùstùs 2014
Kòrsou kontra Trinidad & Tobago
St. Lucia kontra Grenada
24 ougùstùs 2014
Grenada kontra Kòrsou
St. Lucia kontra Trinidad & Tobago