Komunikado di FFK riba selekshon Nashonal ku a klasifiká pa siguiente buèlta di CFU Cup

WILLEMSTAD – Nos selekshon nashonal senior a klasifiká pa e di 3 i delaster buèlta di e CFU Men’s Caribbean Cup Tournament ku a tuma lugá na Guadeloupe resientemente.

Despues ku Kòrsou a sa di empatá kontra Marinique den nan promé enkuentro 1-1, nos selekshon a kai vensí di e ekipo di St.Vincent & The Grenadines ku e skor mínimo di 1-0. Ayera si nos selekshon a sa di gana e ekipo anfitrion, Guadeloupe ku e skor 1-0 i asina sigurá nos klasifikashon pa siguiente buèlta ku un total di 4 punto. E úniko gol di e enkuentro aki a keda anotá pa Vidarel Merencia.

E resultado di e 3 partidonan ei a pone ku nos a klasifiká pa e siguiente buèlta di e CFU Men’s Caribbean Cup Tournament ku lo tuma lugá na Jamaica den e luna di novèmber.

Pa awor aki nos selekshon lo sigui entrená pa asina nos ta kla prepará pa nos kompromisonan di e siguiente buèlta.

Miéntras nos selekshon a gana e ekipo di Guadeloupe i a klasifiká komo number 2 den nos pul, e ekipo di Martinique a gana di St.Vincent & The Grenadines, 4-3 i a sa di klasifiká komo number 1 den e pul.

Tabla di posishon: 

WH WG WE WP GF GK Saldo Punto
1 Martinique 3 2 1 0 7 5 2 7
2 Curacao 3 1 1 1 2 2 0 4
3 Guadeloupe 3 1 0 2 4 4 0 3
4 St Vincent & The Grenadines 3 1 0 2 5 7 -2 3

 

Nos selekshon nashonal senior ta konsistí di un grupo di 19 hungadó ku a wòrdu dirigí pa Sr. Ingemar Pieternella ku ta e direktor tékniko di e selekshon aki i Sr. Jozef Nivillac ku ta e asistente di e direktor tékniko.

Tambe a biaha huntu ku e selekshon Sr. Etiënne Siliee ku ta e advisor di e parti tékniko, Sr. Sherwin Martina ku ta esun enkargá ku e materialnan di e selekshon, un masahista kual ta Sr. Clinton Leocadia i e hefe di delegashon ku ta Sr. Remfis Donker, miembro di direktiva di FFK.

FFK i MCB kier a yama nos selekshon di senior pabien pa nan logro i danki pa un biaha mas a saka kara di nos dushi isla.