Demanda di 5 i 20 aña pa Dangelo ‘Panchèk’ Damascus i Carlos Pieter

WILLEMSTAD – Ayera a kontinuá e tratamentu di e kaso Magnus ora ku Hues a trata e akusashonnan kontra Dangelo ‘Panchèk’ Damascus i Carlos Pieter.

Dangelo ‘Panchèk’ Damascus tin 5 akusashon den su kontra. Damascus ta keda akusá di ta enbolbí den dos kaso di asesinato, unu ta e asesinato di Sr. Helmin Wiels i e otro ta e asesinato di Raul ‘Bolle’ Martinez. Tambe Damascus ta wòrdu akusá di dos kaso di atrako arma i tambe poseshon ilegal di arma di kandela. Pa e akusashon nan aki fiskal Sr. Gert Rip a pidi un kondena di 20 aña pa Damascus.

Pa e akusado Carlos Pieter, fiskal Sr. Rip a pidi un kondena di 5 aña. Carlos tin dos akusashon den su kontra, esta su partisipashon den e  asesinato di Sr. Helmin Wiels i tambe partisipashon den un kaso di atrako.

Den su rekisitorio fiskal Sr. Rip a pasa riba tur e pruebanan ku Ministerio Públiko tin den kontra di e dos akusadonan. Ta trata di primordialmente di deklarashonnan ku e propio akusadonan a duna i tambe deklarashon di otronan den kontra di e akusadonan. Tambe Ministerio Públiko a logra haña evidensia di sierto echonan a base di komunikashon ku a keda di tap.

Abogadonan di Damascus, Sra. Sophia i Lodowica na nan turno no ta di akuerdo ku e pruebanan ku Ministerio Públiko a presentá den kontra di su kliente. Segun e abogadonan, Ministerio Públiko no tin sufisiente prueba pa akusá Damascus di ta enbolbí den e dos kasonan di asesinato, tampoko e poseshon ilegal di arma di kandela. Konsekuentemente e abogadonan ke Hues apsolvé nan kliente di e akusashonnan aki. Pa loke ta trata e kaso di atrako na Hector Henriquez e abogadonan ta rekonosé kulpabilidat di nan kliente. Tambe den e kaso di atrako den Punda e abogadonan ta rekonosé e partisipashon di nan kliente. Pero akinan e abogadonan a pidi pa Damascus wòrdu akusá pa ladronisia i no ladronisia ku violensia ya komo ku no tabata tin violensia den e kaso aki.

Hues a opta ayera tardi pa laga e defensa di Carlos Pieter dor di Sra. Alicia Blonk pa awe mainta. Tambe awe Hues lo disidí si ta posponé e kaso di e akusado Burney ‘Nini’ Fonseca. Den kaso ku esaki no keda posponé, ta kuminsá ku e tratamentu di e kaso di Fonseca awe mèrdia.

Den e kaso di ayera un biaha mas pruebanan tékniko a hasi falta. E kaso di Ministerio Publiko ta basta sólido si tene na kuenta ku hopi di e deklarashonnan ta kuadra ku otro, pero e falta di prueba tékniko ta loke tog ta debilitá e kaso un tiki i por trese sierto duda den algun di e akusashonnan. Sin embargo, tur kos ta bin kai riba kon e Hues ta risibí e deklarashonnan aki, pero ku pruebanan tékniko Ministerio Públiko tabata tin un posibilidat di seya e kaso hermetikamente.