Brian Mariano i Hensley Paulina ku otro intento riba klasifikashon pa Mundial Indoor

GENT, BELGIKA – Brian Mariano i Hensley Paulina tabata tin otro intento pa klasifiká pa e Mundial di atletismo indoor na Sopot, Polonia den wikènt tras di lomba. Ambos atleta ta purbando pa yega Mundial den e evento di 60m indoor.

Lastimá mente, ku niun di e dos atleta nan Kurasoleño no a logra kore e tempu di 6.65 sekònde of mihó pa klasifiká pa e mundial.

Den e evento di Flanders Indoor na Bèlgika, Brian Mariano a kore den e promé buèlta klasifikatorio. Aki nan e atleta a kore un tempu di 6.81 sekònde ku tabata bon pa di kuater lugá. Ku e tempu aki Mariano tabata hopi serka pa klasifiká pa e final pero e atleta Belga, Robin Vanderbemden a klasifiká riba Brian pa e final.

Den e di dos buèlta klasifikatorio, Hensley Paulina a kore. Aki nan e atleta a kore un tempu di 6.87 sekònde ku e pone a atleta finalisá na di shete lugá.

Brian a drecha su tempu konsiderablemente kompará ku e 6.93 sekònde ku e la kore siman pasa na Fransia. Hensley di otro banda no a kore su mihó tempu, mirando ku siman pasa e la kore un tempu di 6.82 sekònde na Amsterdam siman pasa.

E atleta nan tin te ku 24 di febrüari próksimo pa registrá e tempu di 6.65 sekònde of miho pa klasifiká pa e mundial di indoor.