APELDOORN, HULANDA – Brian Mariano i Hensley Paulina a finalisá na di dos i di tres lugá den e kampionato Hulandes di atletismo indoor. Den wikènt tras di lomba a tuma lugá e ‘Nederlandse Kampioenschappen Indooratletiek’ na Omnisport Apeldoorn kaminda tantu Brian Mariano komo Hensley Paulina a partisipá den e evento di 60m indoor.
Den e final Brian Mariano a hasi tur esfuerso pa bira kampion Hulandes pa di sinku biaha pero net no a logra esaki. Mariano a kore un tempu di 6.78 sekònde den final, ku tabata bon pa di dos lugá. Giovanni Codrington a yega dilanti di Brian na prome luga ku un tempu di 6.76 sekònde. Hensley Paulina a finalisá na di tres lugá ku un tempu di 6.86 sekònde.
E evento aki tabata un ultimo oportunidat pa e atletanan logra nan klasifikashon pa e Kampionato Mundial di Indoor na Sopot, Polonia. Lástima mente, niun di e dos atletanan no a logra e tempu límite di 6.65 sekònde pa asina klasifiká pa e mundial na mart próksimo.