Breve Deporte Awe #182 (Seri Mundial)

Resultadonan di Beisbòl Liga Grandi di ayera:

Seri Mundial

  • San Francisco Giants a derota Kansas City Royals ku skor di 3-2

    Ku e viktoria San Francisco Giants ta titulá kampion di Beisbòl Liga Grandi. San Francisco a anotá dos pa bai ariba 2-0 den kabes di dos entrada. Mesora Kansas a respondé bek i anotá dos pa empatá e partido den bòm di dos entrada. Giants a kue e liderato bek den di kuater entrada. Den di sinku entrada San Francisco a manda nan picher estelar Madison Bumgarner, ku a picha e restu di e partido. Bumgarner a bai sinku entrada kompletu permitiendo dos hit sin kareda. Den e Seri Mundial, Bumgarner tabata tin un rèkert di 2-0 ku un efektividat di 0.43. E prestashon aki a pone ku Bumgarner e keda skohe unánimemente komo Hungado-Mas-Balioso di Seri Mundial. Ku esaki e picher ta bira e di shete pelotero ku ta keda nombra komo Hungado-Mas-Balioso di ambos Seri Mundial i e ‘League Championship Series’.

    E título aki ta bira e di ocho título pa e frankisia di San Francisco Giants, e di tres despues ku e ekipo a muda di New York pa San Francisco na 1958. Ku esaki e ekipo ta bira e di sinku ekipo den historia ku ta gana por lo mínimo ocho Seri Mundial, unifikando nan mes ku New York Yankees (27); St. Louis Cardinals (11); Philadelphia/Oakland Athletics (9) i Boston Red Sox (8).

    San Francisco a bira e promé ekipo ku ta gana tres título (2010, 2012 i 2014) den un periodo di sinku temporada despues ku New York Yankees a gana kuater durante e añanan 1996 pa 2000. Tambe e ekipo ta bira e di seis ekipo di Wild Card ku ta gana Seri Mundial. Unifikando ku Marlins 1997, Angels 2002, Marlins 2003, Red Sox 2004 i Cardinals 2011.