WILLEMSTAD – Futbòl Liga MCB su buèlta di 6 a kontinuá ku tres partido den wikènt tras di lomba na Stadion Ergilio Hato. Riba djabièrnè tabata e ekipo di UNDEBA ku a enfrentá SUBT. Akinan tabata UNDEBA ku a logra e viktoria di 1-0 riba SUBT i asina aki logra na pase pa e buèlta di 4. Ku e derota, SUBT no tin niun chèns mas pa drenta den e buèlta di 4. E úniko gol di UNDEBA e keda anotá pa Edgard Casiani.
Riba djasabra tabata tin e di dos partido ora ku Centro Dominguito a topa ku Victory Boys. Akinan tabata Dominguito ku a logra nan di tres viktoria den e buèlta di 6 ganando ku e skor di 2-0. Di e forma aki Centro Dominguito tambe sigurá nan pase pa buèlta di 4. E ekipo di Victory Boys tin un pia den e buèlta di 4 pero mester gana otro siman si nan ke kontrolá nan futuro. E golnan di Centro Dominguito a keda anotá pa Shayron Bernardus i Shaquelle Clements.
Riba djadumingu tabata Centro Barber i Jong Holland ku a mira akshon. Den e partido aki tabata Centro Barber ku a sali di e porta grandi derotando Jong Holland ku skor di 3-1. Ku e viktoria, Barber ta bira e di tres ekipo ku ta logra su pase pa e buèlta di 4. Jong Holland ainda no ta eliminá pero mester gana otro siman i spera ku Victory Boys ta perde of empatá. Den e partidio di ayera e golnan di Barber a keda anotá pa: Norman Hoyer, Kenneth Kunst i Jurensley Martina. Miéntras e úniko di Jong Holland a keda anotá Dannick Koeiman
Tabla di posishon despues di 4 partido:
| Ekipo | PH | G | E | P | GF | GK | GD | Pt |
| Centro Dominguito | 4 | 3 | 1 | 0 | 8 | 2 | 6 | 10 |
| Centro Barber | 4 | 2 | 1 | 1 | 8 | 6 | 2 | 7 |
| UNDEBA | 4 | 2 | 1 | 1 | 3 | 1 | 2 | 7 |
| Victory Boys | 4 | 1 | 2 | 1 | 8 | 9 | -1 | 5 |
| Jong Holland | 4 | 0 | 3 | 1 | 5 | 7 | -2 | 3 |
| SUBT | 4 | 0 | 0 | 4 | 2 | 9 | -7 | 0 |