Andrelton Simmons ta gana Fielding Bible Award

MERKA – Ku Seri Mundial tras di lomba, ta kuminsá e temporada ku ta duna rekonosementu na e diferente peloteronan pa nan prestashon durante di e temporada di beisbòl tras di lomba. Un di e promé rekonosementunan ku ta keda otorgá na e peloteronan ta e ‘Fielding Bible Award’. Esaki ta un premio similar na e tradishonal ‘Rawlings Gold Glove Awards’.

Andrelton Simmons a keda skohe unánimemente pa e panel di 12-persona pa risibí e premio komo mihó shortstop defensivo den beisbòl Liga Grandi den 2014. Esaki ta di dos aña konsekutivo ku Andrelton ta keda skohe unánimemente pa risibí e premio aki.

Segun e panel di ‘Fielding Bible’, “Andrelton tin un alkanse inkreibel riba tereno. Su tempu di reakshon tambe ta inkreibel. Nan ta sigui bisa, e manera ku Andrleton ta usa su mannan ora e tin ku ‘backhand’ e bala of ora e ta transferí e bala di su wante pa su man di tira tambe ta inkreibel. Mas aleu nan ta bisa, ku Andrelton tin e mihó brasa i esun mas presis den beisbòl. Simmons den tres aña a salba 88 kareda ku ta e kantidat mas altu den beisbòl aktualmente (Alex Gordon i Jason Heyward tin 67). Tambe Simmons a bai laga e di dos mihó shortstop den beisbòl kual ta J.J. Hardy ku un gran márgen pa loko ta trata kareda salba. Hardy tin un total di 36 kareda salba kontra 88 di Simmons.”

Adishonalmente, Andrelton ta nominá pa e premio di Wante di Oro tambe. E ganadónan lo keda anunsiá otro siman, djamars 4 di novèmber.

E ganadónan di ‘Fielding Bible Award’ pa aña 2014 ta:

Multiple Posishon – Lorenzo Cain, Kansas City Royals

Primera Base – Adrian Gonzalez, Los Angeles Dodgers

Segunda Base – Dustin Pedroia, Boston Red Sox

Tersera Base – Josh Donaldson, Oakland Athletics

Shortstop – Andrelton Simmons, Atlanta Braves

Left Field – Alex Gordon, Kansas City Royals

Center Field – Juan Lagares, New York Mets

Right Field – Jason Heyward, Atlanta Braves

Kècher – Jonathan Lucroy, Milwaukee Brewers

Picher – Dallas Keuchel, Houston Astros