Entrante Djaluna 5 di Mart, Futbòl Bèk Den Stadion Ergilio Hato

WILLEMSTAD — For di awe, djaluna 5 di mart, partidonan di futbòl lo mira akshon bèk den Stadion Ergilio Hato. Esaki despues ku luna pasa trabou nan a kuminsá pa rekonstrukshon di e tereno.

Awor, trabou nan a terminá i tur kos ta kla pa e partidonan di Liga MCB tuma lugá den Stadion Ergilio Hato.

Un danki ta bai na gobièrnu di Kòrsou, kompania Edelgras, kompania CWM, FDDK i tur esnan ku a hasi posibel ku futbòl por bolbe hasi uso di Stadion Ergilio Hato.

Un danki tambe ta gerensia di Fundashon Barika Hel i SUBT kaminda e partidonan di Liga MCB tambe lo kontinuá.

E partidonan di nos selekshon nashonal di dianan 23 i 26 mart próksimo kontra e selekshon di Bolivia tambe lo tuma lugá den nos stadion nashonal pa 8’or di anochi.

Reservá ámbos fecha pa bo bin apoyá i sostené nos selekshon nashonal, e kampionnan di e Scotiabank Caribbean Cup 2017, komo e di 12 hungadó!

Skema pa e próksimo partidonan di Liga MCB Segundo Divishon:

Djaluna 5 mart 18  19.00 New Song vs Sta Cruz  SDK
 21.00 Dep. Sta Rosa vs FC Sithoc  
Djarason 7 mart 18  19.00 U.D. Tera Kòrá vs Atomic  SUBT
 21.00 Subt vs Indekor  
Djaweps 8 mart 18  19.00 C.H. Mahuma vs De Koning  FFK


Skema pa e próksimo partidonan di Liga MCB Promé Divishon:

Djaweps 8 mart 18 20.00 Vesta vs C. Dominguito
Djabièrnè 9 mart 18 20.00 J.Holland vs CSD Barber
Djasabra 10 mart 18 19.00 Undeba vs J. Colombia
Djadumingu 11 mart 18 18.00 Willemstad vs Scherpenheuvel
Djaluna 12 mart 18 20.00 Victory Boys vs Hub. Fortuna

*Tur e partidonan aki ta tuma lugá na Stadion Ergilio Hato!

Liga MCB Promé Divishon a sigui wikènt tras di lomba ku algun partido sumamente interesante di e segundo buèlta.

Kosnan ta birando kayente paso esaki lo ta e último buèlta promé ku e buèlta di 6 kuminsá i tur ekipo ke ta aden! E preis pa Liga MCB Promé Divishon ta fl.6 pa adulto miéntras mucha di 6 te ku 12 aña i 60+ ta paga solamente fl.2.50.

Liga MCB Segundo Divishon tambe ta kontinuá ku algun tremendo partidonan di e segundo buèlta. Tur e partidonan aki lo tuma lugá na Stadion Ergilio Hato, FFK òf Stadion Dr.Antoine Maduro i e entrada ta kosta fl.3,- pa tur hende.

Un yamada ta bai na hinter e pueblo di Kòrsou pa asistí na e tremendo partidonan di Liga MCB. Bin pasa un ratu ameno den kompania di bo famia i disfrutá di bo deporte preferí e deporte rei, futbòl i e siman aki den nos stadion nashonal!

MCB i FFK ta wardabo!