Waaigat Proyektá pa ta Zona Aquatiko Number 1 den Karibe

WILLEMSTAD — Fundashon Waaigat a lanta ku e meta prinsipal pa aportá na e status di Waaigat komo zona rekreativo mas kotisá den Karibe. Direktiva di Waaigat ta konsistí di Raymond Begina (presidente), Erwin Raphaëla (sekretario) i Eduardo “Dito” de Kort (tesorero). Huntu ku Curaçaose Atletiek Bond i ku sosten di algun empresa, manera Licores Maduro, Bureau Telecommunicatie & Post, UTS, MCB i Refineria ya fundashon Waaigat a logra organisá e promé edishon di Dia di Waaigat, planiá pa djadumingu 17 di sèptèmber binidero di 12or di mèrdia pa 8or di anochi.

E intenshon ta pa tur aña tene Dia di Waaigat i si ta posibel agregá partisipantenan for di eksterior, bini ku demostrashonnan aquatiko i of konkursonan yamativo i moderno, pero interesá turistanan tambe pa rekreá den e “Binnenwater” aki. Fundashon Waaigat komo tal tin e firme propósito pa sòru ku aktividatnan sosial, kultural, edukativo, rekreativo i deportivo di kalidat ta dominá den e área aki, di manera ku Waaigat lo ta ku muchu mas frekuensia den un spòtlait positivo. Énfasis ta ademas riba subi kalidat di e awa i alsa e nivel di seguridat di Waaigat. Konsientemente lo hasi uzo di revistanan internashonal i of otro medionan te asina leu ku ta posibel pa krea kontaktonan ku ta garantisá un alkanse grandi den esfuersonan pa promoshon i oumento di e konosementu di Waaigat. Ku su aktividatnan Fundashon Waaigat en prinsipio ke stimulá e kustumber ku tantu den Waaigat mes komo rondó di e “Binnenwater” ta organisá un variedat di evento, ku ta debidamente planifiká i desaroyá. Asina ei Fundashon Waaigat a tuma pa su mes e enkargo di inventarisá e tipo di eventonan ku ta kuadra pa tene den e área tan úniko aki.

Komo tal ta e intenshon pa riba tèrmino kòrtiku start ku kampañanan intensivo di konsientisashon di komunidat di Kòrsou riba kon kuida e área aki i hasié e “Binnenwater” mas atraktivo den Karibe i otro partinan di mundu.

Konkurso di sakamentu di pòtrèt

Netamente den e kuadro aki mester mira i konsiderá e kòntèst di pòtrètnan di Waaigat ku ta tuma lugá dia 17 di sèptèmber, durante Dia di Waaigat djadumingu awó. Pòtrètnan ku ta partisipá na e konkurso aki mester ta saká e mesun dia! Na esnan ku ta partisipá na e tremendo kòntèst di sakamentu di pòtrèt di Waaigat, e súplika pa yena un formulario di inskripshon, komo e prueba di ta aseptá e reglanan di partisipashon. Ademas ta asina ku mester entregá e pòtrèt(nan) ku nan ta partisipá kuné promé ku 5or di atardi pa un hurado ku konosementu di sakamentu di pòtrèt por someté e pòtrètnan na un evaluashon profeshonal i krítiko, anto asina ei saka e ganadó, ku lo bira doño di premionan atraktivo.

Dirèkt despues di Dia di Waaigat lo sigui ku otro aktividatnan interesante, tur ku e propósito pa rápidamente trese mas bida den e área di Waaigat. Direktiva di Fundashon Waaigat ta invitá pueblo di Kòrsou kordialmente na Dia di Waaigat, djadumingu awor 17 di sèptèmber, ku lo ta di 12or di mèrdia pa 8 or di anochi i ta pidi pa laga nos hasié un enkuentro ku hopi ambiente, espektakular i inolvidabel pa hinter famia. Ta pidi ku bini ku bandera di Kòrsou i mas tantu posibel e kolonan di nos bandera dominá e dia ei. Tur ku ke aportá ku idea of sugerensia na Fundashon Waaigat por tuma kontakto libramente ku miembronan di e fundashon.