WILLEMSTAD — Despues ku djasabra último nos selekshon a empatá na 0 gol kontra e selekshon di Nicaragua durante e wega di fogeo, awe djaluna 19 di yüni pa 5’or di mainta nos selekshon a sali rumbo pa Martinique pa bai representá nos un biaha mas. Esaki en konekshon ku nos kompromisonan di e final di Scotiabank Caribbean Cup 2017.
Dia 25 di yanüari último a tuma lugá e sorteo ku a determiná den kua pul nos lo kai.
E paisnan ku ta den nos pul ta lo siguiente;
- Jamaica
- Martinique
- Kòrsou
- Frans Guyana
E promé partido ta dia 22 di yüni 6’or di atardi entre Jamaica i Frans Guyana miéntras e segundo partido lo ta 8’or di anochi, kaminda nos selekshon nashonal lo enfrentá e ekipo anfitrion, Martinique. Dia 25 di yüni lo tuma lugá e partidonan final kaminda e promé partido lo ta pa e terser i di 4 lugá i e segundo partido lo ta bai ta pa e kampion i supkampion di Scotiabank Caribbean Cup 2017.
Nos selekshon lo regresá Kòrsou dia 26 di yüni pa sosegá i despues kontinuá ku e trainingnan pa nos kompromisonan di Gold Cup 2017 ku lo tuma lugá den luna di yüli na Merka, kual ta otro evento grandi ku lo konta ku kobertura mundial.