Minister Presidente di Kòrsou a bishitá selekshon nashonal durante training

WILLEMSTAD — No opstante su agènda hopi okupá, awe ‘tardi durante e training di nos selekshon na stadion di Vesta, Minister Presidente di Kòrsou Sr. Eugene Rhuggenaath a hasi nos selekshon un bishita. Durante e bishita aki Sr. Rhuggenaath a interkambiá ku diferente di nos hungadónan riba e desaroyo di e preparashonnan pa e 2 kompromisonan importante ku nos mester bai kumpli kune próksimamente. Ela hiba algun palabra pa motivá nos hungadonan i tambe Sr. Rhuggenaath a mustra su sosten i solidarismo na e tremendo trabou ku nos selekshon ta hasiendo dor di pone e nòmber di nos dushi isla un biaha mas na haltu. Por último ela deseá nos hungadónan i nos staf tur klase di éksito pa e final di Scotiabank Caribbean Cup i Gold Cup 2017. Mirando e pasonan históriko ku e ekipo aki ta markando pa nos pais, nos Minister Presidente ta enkurashá pueblo kompletu pa bin stadion tur na e kolonan di nos bandera i yena kada un di e hungadónan aki ku e spiritu di patriotismo pa nan por mantené esaki fresku den nan memoria na momentu di bai representá nos durante e torneo nan aki!

Manera ya ta konosí, selekshon a biaha pa Canada pa asina hunga un partido di fogeo kontra e selekshon di Canada, aya na Canada den stadion Saputo na Montréal. E partido aki a tuma lugá antayera 13 di yüni kaminda nos selekshon a kai vensí ku e skor di 2-1. E gol di nos, a keda anotá pa Rangelo Janga. Ayera, 14 di yüni, nos selekshon a yega Kòrsou ku buelo di American Airlines pa sigui ku e training nan pa e wega di fogeo kontra Nicaragua. E selekshon di Nicaragua a yega awe mitar di 1 di mèrdia i a kuminsá ku nan preparashonnan pa e wega di djasabra.

E partido di fogeo kontra Nicaragua lo tuma lugá djasabra 17 yüni 8’or di anochi den Stadion Antoine Maduro (SUBT).

Karchinan pa e partido aki lo ta optenibel na FFK bou di ora di ofisina, Botika Mampuritu, Beep Beep i pòmp di gasolin Santa Maria.

Dia di wega karchinan lo ta optenibel na e lokèt nan di Stadion Antoine Maduro for di 2’or di mèrdia. Durante tur e partidonan di Liga MCB Promé Divishon di e siman aki tambe nos lo tei den stadion pa benta di karchi!

E partido ta kuminsá 8’or di anochi pero portanan ta habri for di 5’or di atardi, yega trempan pa evitá e tráfiko!

E preisnan pa e diferente sekshonnan ta lo siguiente:

  • Sekshon A; Tribuna pariba di tribuna di honor ta Fl.50,-
  • Sekshon B; Tribuna patras di golnan na lado di Maripampoen ta Fl.25,-
  • Sekshon C; Tribuna patras di golnan na lado di Willemstad òf Tribuna pabou di tribuna di honor ta Fl.25,-
  • Den e sekshon B i C (tribuna patras di golnan) mucha te ku 12 aña i 60+ ta paga Fl.15,-

Tambe nos tin e famoso shalnan atrobe ku diseño nobo i adaptá spesial pa nos klima. E shalnan aki ta optenibel na FFK bou di ora di ofisina i ta kosta solamente fl. 25,-

Un yamada ta bai na hinter e pueblo di Kòrsou pa bin na bòshi, bin disfrutá di un tremendo partido! Sali ku bo bandera di Kòrsou, bo t-shirt, bo shal, bin apoyá i sostené nos hungadónan komo e number 12!

Share
MAS RESIEN
Selekshon Nashonal di Kòrsou a sali pa Martinique
WILLEMSTAD -- Despues ku djasabra último nos selekshon a empatá na 0 gol kontra e selekshon di Nicaragua durante e wega di fogeo [mas]
Wikènt  di Sòftbòl  Liga CSB/MCB a sigui ku vários weganan den femenino i maskulino
WILLEMSTAD -- Resultado Femenino Klase AA: [mas]
FDDK Ta Presentá Resolushonnan Di Kongreso Di Deporte 2017 Na Konseho Di Minister
WILLEMSTAD -- Manera ta ampliamente konosí, durante di e fin di siman di 8 pa 10 di yüni a tuma lugá e Kongreso di Deporte 2017; ‘Integrá, Aselerá, Elevá’, organisá pa Fundashon pa Desaroyo Deportivo Kòrsou. [mas]
Pisina Enith Brigitha a Habri Bèk
WILLEMSTAD -- Djaluna último, funshonario di GGD huntu ku personal di FDDK, a tuma muestra di e awa di Pisina Enith Brigitha pa por hasi tèst despues di a hasi limpiesa na e pisina; esaki, despues ku algun antisosial a vandalisá nos pisina. [mas]
Minister Presidente di Kòrsou a bishitá selekshon nashonal durante training
WILLEMSTAD -- No opstante su agènda hopi okupá, awe ‘tardi durante e training di nos selekshon na stadion di Vesta, Minister Presidente di Kòrsou Sr. Eugene Rhuggenaath a hasi nos selekshon un bishita. [mas]
Korsou ku tres medaya den Surinam Taekwondo Open 2017
SURINAME -- E skol di Taekwondo Olympia Taekwondo Association resientemente (10-06-2017) a partisipá na un kompetensia internashonal ku a tuma lugá na Sürnam. [mas]