Curaçao Challenge ta spera un públiko grandi den wikènt di Asunshon

WILLEMSTAD — Den Wikènt di Asunshon di 25 te ku 28 di mei ya kaba e di nuebe Curaçao Challenge ta tuma lugá. E kompetensha di windsurfing mas grandi di aña akí ta tuma lugá riba Spaanse Water na Windsurfing Curaçao i lo mustra, sigun organisadó prinsipal Hilde Schnitzler, kompetenshanan eksitante di Slalom i Freestyle. Schnitzler: “ Ku partisipantenan fuerte for di Aruba i Boneiru i un grupo di talento di sùrf hopi fanátiko di Kòrsou, nos ta spera ku lo tin hopi bientu i tambe un públiko grandi!”

Lès di windsurfing grátis pa  e públiko interesá.

Durante Curaçao Challenge tin kompetensha 4 dia largu den 3 diferente kategoria. Asina tin kompetensha pa rookies, winsurfernan hóben ku no tin masha eksperiensha ainda i pa windsurfernan di slalom i freestyle ku hopi mas eksperiensha den kompetensha. Pa loke ta e kompetensha di slalom e windsurfernan ta kuminsá huntu i mester kompletá un ruta ku ta indiká ku bui den laman mas lihé posibel. Den freestyle kada bia 2 windsurfer ta desafiá otro pa hasi mas tantu kenshi difísil posibel den 4 minüt. E ganadó ta sigui pa e próksimo rònt.

E kompetenshanan di slalom i freestyle ta tuma lugá diariamente for di 10 or di mainta  te 4’or di atardi i entrada ta grátis pa públiko. Esun ku ta deseá esaki por haña lès di windsurfing grátis for di 3’or di atardi serka e instruktornan di Windsurfing Curaçao, i asina por sera konosí ku e deporte di windsurfing. Mayoria partisipante den Curaçao Challenge ta bou di 18 aña. Nan no ta disfrutá solamente di e kompetensha, sino tambe di e ambiente dushi rondó di e evento. Asina djasabra anochi for di 6or tin un BBQ, tanten 7’or tin un pelíkula hopi leuk tambe tokante sùrfmentu pa solamente 20 florin pa persona.

Hopi partisipante femenino fanátiko e aña akí.

Schnitzler ta spera ku e aña aki mas o ménos 75 windsurfer ta partisipá na Curaçao Challenge. E nivel lo ta haltu, ku partisipashon di algun windsurfers lokal hóben manera Kareem Naipal, Wave Antonia I Ryan Richie, ku otro aña probablemente lo partisipá na e kompetensha di freestyle di PWA (Professional World Association). Maske tumando un promedio tin mas tantu mucha hòmber ta partisipá ku mucha muhé, e aña akí e damanan ta bon representá ya ku tin bastante mucha muhé ku ta práktika  windsurfing  ta bini for di Aruba.

Windsurfing ta un deporte popular riba islanana ABC ku kompetenshanan manera Curacao Challenge, Aruba High Winds i Sorobon Masters. Tòg e organisashon ta dependé di boluntario. Schnitzler: “ banda di mi tim di boluntario leal, e aña akí mi por konta ku Victor Wijnand, un race director ofisialmente rekonosé ku ta bini spesialmente pa e evento akí for di Boneiru. I maske no tabata fásil pa  haña spònser, danki Dios mi por konta ku sosten di Securitas, Coca-Cola, Chogogo, CPS, VR Shipping N.V., de Mermaid, Obsession, ENNIA i Zapata Fly Board.

Hilde Schnitzler i su kasá Ingmar for di 2006 ta dediká nan mes ku alma i kurpa na windsurfing na Kòrsou. Asina nan ta hür, bende i drecha material di windsurfing, nan ta duna lès i ta organisá SUP (Stand up peddeling tours) .Curaçao Challenge ta un trabou di organisashon duru pero leuk, i ku esaki nan ta stimulá talentonan di windsurfing hóben pa surpasá nan mes i asina haña mas eksperiensha ku kompetensha i mes ora tambe pone windsurfing komo deporte akuátiko dinámiko riba mapa serka un públiko mas grandi.

Pa mas informashon bo por bishitá página di Facebook di Curaçao Challenge òf yama  + 5999 -7380883

Share
MAS RESIEN
Korsou ta Logra un Empate di 1 Gol ku Haiti
PORT AU PRINCE -- Nos selekshon nashonal a empatá ku Haiti na 1 gol durante nos segundo enkuentro di e di 2 buèlta di Nations League. Elson ‘Sontje’ Hooi a anotá e úniko gol di nos selekshon ku a keda dediká na nos kiper, Jarzinho Pieter ku a fayesé di forma repentino djaluna último na Haiti. [mas]
Nos Selekshon Ta Di Luto Despues Di Pèrdidá Sensibel Di Nos Portero Jarzinho Pieter
PORT AU PRINCE -- Ku doló profundo na nos kurason nos ta anunsiá fayesementu repentino di nos miembro Jarzinho Pieter, kiper di nos selekshon nashonal. Jarzinho, un hóben futbolista prometedor ku un futuro briante su dilanti a fayesé di un forma repentino durante nos estadia na Haiti [mas]
Nos Selekshon Nashonal Lo Enfrentá Haiti Dia 7 Di Sèptèmber  Den SDK, 6’or Di Atardi!
WILLEMSTAD -- Manera ya ta konosí, nos promé kompromiso durante e di 2 buèlta di Nations League lo ta kontra Haiti dia 7 di sèptèmber próksimo pa 6’or di atardi den Stadion Ergilio Hato. [mas]
Klínika Real Madrid Organisa pa Vesta
WILLEMSTAD -- Direktiva di Vesta kier informá tur coach i miembronan di deporte lo siguiente. For di awe tur coach por inskribí nan mes pa por partisipá na e klínika di Real Madrid. Despues di inskripshon 8 coach lo ser selektá pa partisipá na e klínika i 1 coach lo tin e previlegio pa bai Real Madrid. [mas]
Klínika Pa Dama; Curaçao’s Mission For Woman’s Football Tabata Un Ékstito Rotundo
WILLEMSTAD -- Djadumingu, 16 di dezèmber último SUBT den koperashon ku FFK a organisá un tremendo klínika pa damanan ku ambishon pa e deporte di futbòl di 6 pa 21 aña di edat. E klínika a karga e nòmber; ‘Curaçao’s Mission for Woman’s Football’ i a tuma lugá di 8:30am-12:30pm na Stadion Dr. Antoine Maduro (SUBT). [mas]
Korsou kontra Guadeloupe Djaluna 19 Di Novèmber Den Stadion Ergilio Hato
WILLESMTAD -- Awe den oranan di atardi nos hungadónan residensiá den eksterior a pisa suela di Kòrsou pa asina djòin nos hugandónan lokal pa kontinuá ku e preparashonnan pa e gran partido di djaluna 19 di novèmber próksimo den Stadion Ergilio Hato pa 8’or di anochi. [mas]