‘Kickoff’ Flow Carifta Games 2017

WILLEMSTAD — Manera ta konosí, Kòrsou ta organisadó di e Flow Carifta Games 2017. E evento di atletismo mas grandi di Caribe, ku ta tuma lugá di dia 15 pa 17 di aprel 2017 próksimo.

Durante fin di siman último, djasabra pa ta mas eksakto, e komishon organisadó (StOA) di e Carifta Games 2017 di forma ofisial a organisá un tremendo ‘’Kickoff’, kual a duna inisio di forma ofisial na e siman di aktividatnan pa loke ta Carifta Games 2017. Un kantidat di invitado tabata presente den stadion Ergilio Hato na SDK, pa a presensia e aktividat aki. E aktividat a kuminsá ku e parti di kantamentu di nos himno nashonal kompañá pa e hisamentu di nos bandera. Seguidamente e presidente di e komishon organisadó ku ta Sr Igor Cijntje a hiba palabra na tur presente i a sigui un kantidat di aktividat programa riba e dia aki. Presidente di CAB, Sr Willem Cordilia, a hiba su disertashon na esnan presente i a gradisí tur esnan enbolbí den e realisashon di e gran evento aki. Tabata interesante tambe pa a duna rekonosementu na e diferente patrosinadornan ku a kontribuí en grandi pa e aktividat aki por a tuma lugá.

Nos minister di enseñansa Sra Maurina-Esprit-Maduro tambe a hiba palabra durante di e aktividat aki rekordando su periodo komo atleta. Un parti sumamente emotivo i importante tabata e huramentashon di e atletanan. E atletanan Kamese Halstead i Jaden Bernabela tabata esnan ku a huramentá na nòmber di e atletanan i despues a sigui e parti di entrega di e bandera di Kòrsou ku e delegashon lo kana kuné durante e desfile di apertura. Esaki a keda entregá di parti minister di enseñansa Sra Maurina-Esprit-Maduro na e atletanan Kamese Halstead i Jaden Bernabela. A hasi uzo tambe di e aktividat aki pa e fundashon StOA firma un akuerdo ku e Fundashon FDDK. Tabata Sr. Thakai Doran (FDDK) huntu ku Sr. Igor Cijntje (StOA) ku a firma e akuerdo aki. Despues di e parti ofisial tur esnan presente por a disfrutá un ratu ameno ku otro i por a tuma nota tambe di e reparashonnan i ahustenan ku a keda apliká na stadion Ergilio Hato. Pues ofisialmente nos a drenta e siman krusial i awor ta toka turno na e pueblo di Kòrsou ku mester sostené i apoyá nos atletanan durante e dianan 15, 16 i 17 di aprel próksimo.

Nos ke rekordá un i tur ku por kumpra karchi na e puntonan di benta ku ta “24 uur uit de muur”, “Mensing’s Caminada” i “Samsom”. Na SDK tambe por kumpra karchi den oranan di ofisina na e parti kaminda e bar ta situá.

E preisnan ta varia entre 9 i 20 florin, kaminda mucha bou di 13 aña por drenta grátis, basta nan ta kompaña pa un adulto.

Nos atletanan ta konta ku e sosten di nos kada un, manera un bon yu di Kòrsou.