HAPON — Wladimir Balentien a keda ekspulsá for di e partido aki despues ku a surgi un forsageo entre e pelotero di Kòrsou i koach di Hanshin Tigers Akihiro Yano. Esaki a sosodé den di sinku entrada na momentu ku e bankinan a bira bashí despues ku picher di Hanshin Tigers a dal pelotero di Tokyo Yakult Swallows ku bala.
E ekipo di Tokyo Yakult Swallows a gana e partido ku skor di 3-1. Wladimir a konektá su promé honron di temporada den e partido. E pelotero a bai di 2-1 ku un kareda anotá i otro empuha den e partido.
Promé honron di temporada di Wladimir Balentien
Despues di e partido Balentien a deklará riba red sosial, ‘ku henter e asuntu ta kuestion di protehe su kompañero di ekipo, pero e ke pidi su diskulpa na tur su fanátikonan i muchanan pa e insidente ku a tuma lugá.’
Forsageo entre 'Coco' i koach di Hanshin Tigers
Ámbos e ekipo lo enfrentá otro pa dos partido mas e siman aki. Miéntras tantu tin ku warda wak si ‘Coco’ lo risibí kastigu di e Liga di Beisbòl Profeshonal Hapones.
Den Liga Grandi ayera:
- Andrelton Simmons a bai di 3-1 ku un base por bola pa Los Angeles Angels.
- Jonathan Schoop a bai di 4-0 pa Baltimore Orioles.
- Jurickson Profar tambe a bai di 4-0 pa Texas Rangers.
- Xander Bogaerts a bai di 4-3 ku dos base roba pa Boston Red Sox.