MERKA — E batido designa di e selekshon di Reino kual ta Didi Gregorius a keda kita for di e roster di e selekshon di Reino pa motibu di leshon. Gregorius ku tabata tin un promedio di .348 durante e Klásiko Mundial di Beisbòl mester a bandoná e selekshon ku leshon na skouder.
Segun manager di New York Yankees Joe Girardi, Gregorius a keda diagnostiká ku un hematoma na altura di su skouder. Gregorius ya ta na kaminda pa e kampamentu di entrenamentu di New York Yankees na Florida pa mas evaluashon.
Awe 9’or di anochi ora lokal di Kòrsou e selekshon di Reino lo hunga semifinal di e Klásiko Mundial di Beisbòl den Dodger Stadium na Los Angeles. Pa e selekshon di Reino Rick van den Hurk lo habri e partido.
Miéntras tantu Kenley Jansen tambe ta huntu ku e selekshon di Reino. Ofisialmente Kenley ta riba e roster di e selekshon. Pa hasi lugá pa Kenley, Orlando Yntema a wòrdu kita.