Diegomar Markwell ta habri awe pa Tim di Reino

HAPON — Despues di a kibra invikto di e tim di Israel, e Tim di Reino Hulandes ta den ful preparashon pa topa e siguiente kontrinkante. Djamars 14 di mart 2017, pa 11’or di anochi ora di Kòrsou, e Tim di Reino ta enfrentá e Cubanonan pa determiná si ta pasa pa semifinal.

Diegomar Markwell lo ta riba montikulo pa habri e partido di awe kontra Cuba.

E speransa di yega semifinal a keda bibu durante di e partido kontra di Israel paso e Tim di Reino a presta di forma impreshonante. E hungadónan guiá pa Hensley Meulens a hinka total 12 kareda i e kontrinkante a anotá solamente 2 kareda. Ku un bon bataso di Yurendell de Caster tantu Didi Gregorius komo Jonathan Schoop a anotá e promé dos karedanan. Didi Gregorius i e debutante Shawn Zarraga a bati doblete pa hinka tres di e kuater karedanan.

Den di kuater inning e skor a yega 10 pa 0 na man di bateo di Wladimir Balentien i un bataso kuadrangular di Didi Gregorius ku a sòru pa tres kareda. Al final, e Tim Oraño a logra 15 hit ku e protagonistanan Wladimir Balentien (4-3), Yurendell de Caster (5-3), Andrelton Simmons (5-3) i Didi Gregorius (3-2). Debí na e bateo fantástiko, e picher habridó Jair Jurrjens a haña tur trankilidat pa bira e promé picher ku a sera kuater inning pa e tim aki.

Awor tur konsentrashon ta riba preparashon pa e partido kontra di Cuba. Den e edishon anterior di World Baseball Classic (WBC), Tim di Reino a sa di gana Cuba i pone ku nan no a pasa pa semifinal. Den e promé buèlta di WBC e aña aki Cuba a forma parti di Grupo B den kual nan a pèrdè e promé partido kontra Hapon pero a gana di China i Oustralia. Despues e Cubanonan a pèrdè kontra Israel i tin un partido mas pendiente kontra Hapon promé ku topa Tim di Reino.

Miéntras tantu mènedjer Hensley Meulens ta duna e Tim di Reino un deskanso bon meresí. Meulens a duna di konosé ku: “Nos tabata asina kontentu ku e viktoria di e di dos partido kontra di Taiwan, esun ku nos a pasa pa e di dos buèlta kun’é. Por sierto e partido a kaba hopi lat i nos a disidí pa no hasi e seshon di batting practice e dia siguiente promé ku e partido kontra Israel. Siman pasá e hungadónan tabata kansá i ala bes emoshonal pa e partido kontra Israel.”

Meulens a sigui bisa ku: “Nos ta bai hasi kosnan diferente e biaha aki. E hungadónan ta haña un dia liber. Nos tin sigur dos siman ta traha duru sin dia liber. Deskanso ta mes un importante ku traha duru. E tim tin mester di deskansá i despues di tur e esfuersonan, nan tin derechi riba esaki pero nos no ta bai rilèks paso nos mester ta fuerte pa e partido kontra Cuba.”

Tambe Meulens a reflehá riba e kambionan di hungadó: “Mester tene kuenta ku situashon di kada hungadó i tin ora bo tin partidonan ‘do-or-die’ den kual bo mester usa bo intuishon. Den hasi esaki ta bini kambio den e aliniashon pa duna sierto hungadó mas espasio pa sinti konfortabel ku e line up. Tambe pa e otro hungadónan por haña un chèns. E kambio aki a resultá nos bon den e partido mas resien.”

Share
MAS RESIEN
Kòrsou Kontra Bolivia Dianan 23 I 26 Di Mart Den Stadion Ergilio Hato
WILLEMSTAD -- Preparashon nan ta kontinuá pa e 2 enkuentronan di nos selekshon nashonal ku lo enfrentá e selekshon di Bolivia durante 2 wega amistoso ku lo tuma lugá dianan 23 i 26 di mart próksimo den Stadion Ergilio Hato pa 8’or di anochi. [mas]
Kòrsou ku Mas di 40 Trofeo den Kompetensia di BMX na Florida
MERKA -- Di 22 pa 25 di Febrüari 2018 Kòrsou a partisipá na un kompetensia internashonal di baiskel BMX ku a tuma lugá na Oldsmar, Florida USA, yama “Gator Nationals”. [mas]
FFK ta Selebrá Dia Internshonal di Hende Muhe ku e Apertura di Kampionato di Dama 2018
WILLEMSTAD -- Manera ya ta konosí, mañan 8 di mart mundu ta selebrá dia internashonal di hende muhé. FFK den kolaborashon ku SUBT tambe lo selebrá e dia spesial aki dor di duna inisio na e kampionato di dama netamente riba e dia dediká na e ser muhé. [mas]
Souax Gill’sport Ta Sigi Invikto Den Kampionato Hubenil Csb/Mcb 2018
WILLEMSTAD -- Despues di un wikent karga ku partido e ekipo di Souax ta mantene nan invikto den e kampionato hubenil. [mas]
Entrante Djaluna 5 di Mart, Futbòl Bèk Den Stadion Ergilio Hato
WILLEMSTAD -- For di mañan, djaluna 5 di mart, partidonan di futbòl lo mira akshon bèk den Stadion Ergilio Hato. Esaki despues ku luna pasa trabou nan a kuminsá pa rekonstrukshon di e tereno. [mas]
Kampionato hubenil patronisa pa MCB a sigi Djadumingu
WILLEMSTAD -- Despues ku awaseru a empedi e weganan di djabierne i djasabra pa sigi, pero ajera djadumingu si den un dushi weer e kampionato hubenil a kontinua ku 4 partido. [mas]