WILLEMSTAD — Ku mira riba Kopa Karibe i e edishon 2017 di Gold Cup e selekshon nashonal di Futbòl di Kòrsou lo kuminsá prepará den luna di mart aki. Entre dianan 20 i 29 di mart e selekshon lo bin huntu na Kòrsou pa un kampamentu di entrenamentu.
Banda di esaki e selekshon lokal lo hunga un partido di fogeo kontra su rivalnan di Grupo C den Gold Cup kual ta El Salvador. E partido aki lo tuma lugá riba 22 mart próksimo pa 8’or di anochi na stadion di SUBT.
Mas aleu ta konfirmá tambe ku e selekshon di Kòrsou lo hunga un partido amistoso kontra Canada. Esaki lo tuma lugá dia 13 di yüni den Stade Saputo, na Montreal Canada.
Banda si e dos partido amistoso nan aki tin informashonnan ku tin interes di algun otro pais pa hunga partido di fogeo kontra Kòrsou. Aparentemente, Luxemburgo, Uganda i Venezuela tin interes pa fogea kontra e selekshon di Kòrsou. Ainda no tin nada konkreto ku niun di e paisnan aki.