WILLEMSTAD — Resientemente District Administrator di Curaçao Little League, señor Urny Florán, a firma un akuerdo ku Fundashon Pa Nan, presidí pa señor Dennis Dambruck. E akuerdo ta enserá ku Fundashon Pa Nan ta ser enkargá ku organisashon di kampionato di Baseball pa hóbennan di 4 te ku 8 aña di edat, bou di reglanan di organisashon di Little League Internashonal, e asina yama divishon di Tee Ball i Pre- Infantil.
Den pasado organisashon di Curaçao Little League no tabatin un kampionato pa hóbennan di e edat aki. Ekiponan tabata hunga diferente torneo organisá dor di tersera kaminda nan ta hunga un kantidat mínimo di wega i ku reglanan diferente. Un otro punto di konsiderashon ta ku pa motibu ku no tin kampeonato ofisial di Little League hopi organisashon afiliá na Little League no tin interes di tin team den e divishon nan aki i ta opta pa kuminsá forma hóbennan na un edat mas grandi. Tambe District Administrator a konsiderá e echo ku organisashon mundial di Little League situá na Williamsport a tuma e desishon resientemente pa paisnan dediká mas atenshon na hóbennan na un edat mas yòn.
Ku firmamentu di e akuerdo aki Curaçao Little League ta dal e promé stap den formashon di hóbennan for di edat di 4 aña. Di e forma aki por siña e hóbennan na un edat mas yòn balornan di rèspèt, kurashi, karakter, lealtat i deportivismo i asina nan por ta mas mihó prepará den e divishonnan mas haltu pa hunga riba nivel nashonal i internashonal.
Curaçao Little League a skohe pa Fundashon Pa Nan, dor ku e fundashon tin komo meta edukashon di hóben na promé lugá. Fundashon Pa Nan tin eksperensia den organisashon di torneo di baseball. Último dos aña e fundashon a organisá kampionato pa e hóbennan di e edat aki. Den pasado Fundashon Pa Nan tabata enkargá ku un par di torneo pa hóbennan di 13 te ku 18 aña. Mester bisa ku tur e torneonan aki tabatin hopi éksito.
No tin niun duda ku e akuerdo aki lo benefisiá nos hóbennan i ku nos lo bai haña un kampionato na nivel pa nos futuro peloteronan. Inisio di e kampionato lo ta den kabamentu di mart próksimo.