FIFA ku karta di felisitashon pa e ekipo kampion di Liga MCB Promé Divishon

WILLEMSTAD — Manera ya ta konosí Centro Dominguito a resultá e ekipo kampion di Liga MCB Promé Divishon. Den kuadro di esaki president di FIFA, Sr. Gianni Infantino a manda un karta na Federashon Futbòl Kòrsou destiná na e ekipo kampiona di Liga MCB Promé Divishon felisitando nan pa nan logro. Sr. Infantino a splika den su karta ku e viktoria nashonal ta un gran oportunidat pa haña satisfakshon di un trabou bon ehekutá.

Mas aleu ela splika ku tras di kada éksito tin e konfiansa i e esfuerso di hopi hende envolví.

E viktoria ta unu di e ekipo kompletu. Tantu di e hungadónan, entrenadónan, e staf kompletu i mas ku klaro di e fiel fanátikonan. E dinamismo i e kompromiso di Centro Dominguito ta netamente loke a hiba nan na e triunfo aki.

Awor mas ku nunka futbòl ta demostrando ku e por surpasá tur e opstakulonan tradishonal i bira un empuhe pa desaroyo. E ta pèrmití hungadónan riba tur nivel pa desaroyá nan dinamismo, abilidatnan pèrsonal i nan táktika ku téknikanan. Sr. Infantino ta konvensí ku futbòl ta un espesie di skol ku por eduká tur hende i spesialmente e hubentut ku ta lantando. Tur hende por saka un benefisio for di praktika futbòl. Futbòl por yuda hopi riba e tereno sosial i pèrsonal den un persona su bida. P’esei mi ta urgi e ekipo di Centro Dominguito pa sigui ku e bon trabou riba e kaminda pa éksito. Asina Sr. Infanto presidente di FIFA a terminá bisando.

Durante e torneo di U-20 ku a tuma lugá Sr. Veron representante di FIFA ta tei di bishita aki na Kòrsou i a hasi entregá di un ‘vandel’ na presidente di FFK Sr. Rignaal ‘Jean’ Francisca.

E rekonosementu aki a keda otorgá na FFK komo muestra di gradisimentu i apresio pa e gran trabou ku FFK a bin ta ehersé den e ambitó di futbòl.