PUERTO RICO — E selekshon nashonal di Korsou ta logra historia klasifikando pa su prome Kopa Oro. E viktoria pa e selekshon di Korsou no a bin fasil ya ku e selekshon a kai atras trempan den e partido. Na final di e prome mitar Korsou tabata atras 2-0 koriendo e peliger ku si nan permiti un gol mas Puerto Rico lo avansa outomatikamente i Korsou lo tin ku hunga playoff pa di sinku luga.
Sin embargo, e hungado nan di Korsou a bin ku otro intenshon den di dos mitar. Akinan ku golnan di Rangelo Janga i Leandro Bacuna Korsou ta empata e partido na dos. Despues den tempu ekstra Korsou ta kue e bentaha ku golnan di Leandro Bacuna i Felitciano Zschusschen. Ku e resultado di 4-2 Korsou ta gana e partido i alabes klasifika pa Kopa Karibe 2017 i Kopa Oro 2017.
Kopa Karibe no ta deskonosi pa e selekshon lokal, kaminda ku na aña 1989 bou di bandera di Antias Hulandes e selekshon ta logra kue e di tres puesto den e kopa. Den Kopa Oro nunka e selekshon lokal no a yega di partisipa i na 2017 lo bira su prome partisipashon den esaki. Na dos okashon Antias Hulandes a partisipa den Kampionato CONCACAF prome ku e bira Kopa Oro na aña 1991.