WILLEMSTAD — Kòrsou ta ku un pia den Kopa Oro, esaki despues di a derota e ekipo di Antigua i Barbuda ku skor di 3-0 den Stadion Ergilio Hato riba djárason 5 di òktober. Kòrsou a habri e markadó na di 12 minüt ku gol di Leandro Bacuna.
E partido a bai kas tempu kompletu ku e skor di 1-0 apesar di numeroso oportunidat ku e selekshon di kas a haña pa amplia e markadó. Sin embargo, esaki ta kambia na di 80 minüt ora Rangelo Janga ta manda e selekshon ariba 2-0. Na di 90 minüt Gino van Kessel ta anotá otro pa Kòrsou i hasi e partido 3-0.
Ku e viktoria aki Kòrsou ta lidera Grupo 3 di e terser buèlta di Kopa Karibe. E selekshon di Kòrsou lo hunga su di dos i último partido di e terser buèlta dia 11 di òktober próksimo na Puerto Rico kontra e selekshon Borikua.
Den kaso ku Kòrsou logra keda na kabes di Grupo 3 e selekshon ta klasifiká outomátikamente pa CONCACAF su Kopa Oro otro aña. E torneo aki ku ta similar na Kopa Europeo na Europa òf Kopa Amérika den Sur Amérika lo tuma lugá entre 9 di yüli pa 30 di yüli di 2017.