Eksitoso kurso pa entrenadó di dama ouspisiá pa FIFA

WILLEMSTAD — Resientemente, komo parti di e programa edukativo di FFK, a tuma lugá un kurso di nivel avansá pa bira entrenadó di dama ouspisiá pa FIFA. Sra. Andrea Rodebaugh, instruktor di FIFA, tabata esun enkargá pa duna e kurso aki ku a konta ku un total di 26 partisipante.

Sra Andrea Rodebaugh, oriundo di Méhiko, ta un eks futbolista ku den pasado a partisipá na mundial di dama i tambe a fungi komo kapitan di e selekshon di futbòl mehikano di dama. Aktualmente Sra. Andrea ta un instruktor di FIFA ku ta dediká su mes na duna diferente kurso di futbòl di dama i kompartí su konosementu i eksperensia ku otronan.

Meta di e kurso aki ta pa stimulá e interes di futbòl pa dama aki na Kòrsou. Den e aktual kampionato di dama nos tin solamente 4 ekipo partisipando i ta e intenshon pa den futuro nos futbòl konta ku mas ekipo pa asina engrandesé futbòl di dama.

E kurso a kuminsá djárason 21 di sèptèmber i a terminá djadumingu 25 di sèptèmber.

Den e promé parti di e kurso e kursistanan a haña e parti teorétiko ku diferente informashon i material di FIFA ku tabata destiná pa e kurso aki. Tambe e kursistanan ta tin diferente seshon den grupo kaminda nan tabata diskutí i interkambiá di opinion riba e diferente tópikonan ku nan a haña durante e kurso. Den e di dos parti, esun práktiko, e kursistanan mester a apliká loke nan haña den e parti teorétiko di e kurso aki huntu ku un grupo di hobensita futbolista, ku ta militá den diferente ekipo di nos Kampionato di Dama, ku a bin pa yuda durante e práktikanan di e kurso.

Despues di 5 dia di kurso intensivo tur e kursistanan aki a kaba e kurso ku éksito a risibí nan sertifikado komo entrenadó di dama, nivel avansá.

Awó nos por bisa ku e famia di futbòl pa dama ta konta ku 26 entrenadó di dama mas.

FFK ta hasi un apelashon na tur e personanan ku no ta pertenesé na un klup ainda, pa djòin un klup di FFK pa yuda desaroyá i engrandesé e deporte di futbòl pa dama!

FFK ta deseá tur e kursistanan aki éksito i pabien ku nan logro!