Promé klèshnan di KAMPIONATO 2016 – sòftbòl fastpitch era nobo

WILLEMSTAD — Frank Curiel ballpark ayá na Sta. Maria lo bira e esenario pa e promé klèshnan den sòfbòl femenino fastpitch pa loke ta trata e kampionato di 2016. Esei lo ta awe djawebs  22 di sèptèmber 7’or, ora e kampion i e supkampion di 2015 topa ku otro bèk despwes di kasi 1 aña. E ekipo kampion di Kòrsou kwal ta Sta. Rosa Angels Vanddis a start kampionato zetá ku nòkout riba su kontrinkante mientras ku Pichingolo Nissan tambe a start kampionato zetá ku ya 2 nòkout kontra su kontrikantenan. Logikamente tur dos ekipo lo bin tur ku tin pa keda den e ambiente di viktoria.

Pa 9’or lo sigi ku Vipers kontra Eagles Softex. Tur dos equipo ta buskando nan promé viktoria di e kampionato aki.

Federashon di sòfbòl di Kòrsou ta invitá tur fanatiko pa bin presensia e dos partidonan aki ku ta primintí di trese bon ambiente di sòfbòl den Frank Curiel Ballbark.

Bo ta gusta deporte… yega Frank Curiel Ballpark awe nochi, bin apoya, disfruta i forma parti di e era nobo di sòfbòl fastpitch.