WILLEMSTAD — Djasabra anochi ku un bunita desfile 15 ekipo partisipante den sòfbòl fast pitch a inisiá e kampeonato 2016 na Stadion di Post 6. E brasbènt di St. Jozef VSBO bou di guia di sra. Jeandor, a kompañá e ekiponan musikalmente. Yufrou Bridgewater a kanta e himno nashonal dilanti di un bon públiko. Ku a asistí.
E kampeonato ta dediká na sra. Norma ‘Nooi’ Carolina. Nooi tabata aktivo pa kasi 3 dékada den sòfbòl lokal. Den su tempu e tabata simplemente impekabel riba e picher plate. E tabata miembro di diferente selekshon, tantu di Kòrsou komo di Antia. Na diferente okashon e la konkistá premio individual komo hungadó i a yuda tantu su ekipo komo selekshon kampeonisá.
Riba petishon di e bestür di CSB, sr. Welton ‘Papi’ Esprit a dediká atenshon n’e parti spiritual. Papi Esprit a para ketu na lokual e ta konsiderá e 3 pilanan pa éksito. Disiplina, determinashon i dedikashon. Nan ta importante tantu riba komo pafó di fèlt. E presidente di CSB, sr. Lernnerth Angela a enfatisá e kompromiso ku bestür di CSB tin ku e sòfbòlistanan pa engrandesé sòfbòl i hib’é bek na nivel di gloria ku Antia i Caribe a konosé ántes. Por último e Minister enkargá ku entre otro e kartera di deporte, Sr. Irene Dick, a dediká palabra na sra. Norma Carolina, sòfbolistanan i públiko presente. Ku poko palabra e la ilustrá e importansia di deporte i e la gradisí Nooi pa su aporte ku e a duna durante tur e añanan ku e tabata aktivo.
Despues ku Nooi a lansa e promé bala, umpire a kanta play ball pa weganan inougural por a kuminsá. Públiko a mira dos bon wega den kua e ekipo maskulino Dream Team a vense Suffisant Eagles pèrtá ku skor di 5-4 i Pichingolo Nissan a bin di atras pa gana Vipers ku skor di 13-5.
E ambiente di sòfbòol a sigi djadumingu ku 3 wega, 1 wega den klase A i 2 den AA. E prome wega den klase A bai entre Pichingolo Nissan i Santa Rosa Angels Vandis. Sta. Rosa a nòkout Pichingolo ku skor di 12 pa 2. Pa Sta. Rosa 12 kareda 8 hit i 1 eror, pa Pichingolo 2 kareda 4 hit I 1 eror. Picher ganadór Quilin Coeriel, picher perdedó Dyshanique Camelia. Mihó bateadó pa Pichingolo tabata Maria Macia di 2-2 i pa Sta. Rosa Mareiene Semeler di 2-2. Tabatin un homerun den tereno di Dyshanique Camelia.
Den e di 2 wega ku tabata den e klase di AA, St.Rosa Angels Vandis a nòkout e ekipo di Vipers ku skor di 12-0. Pa Sta. Rosa 12 kareda 8 hit 2 eror. Pa Vipers 0 kareda1 hit 3 eror. Picher ganadó a resultá Tedy Faneyt ku a tira one hitter, picher perdedó Lisandra Ursulita. Miho bateadó pa Sta. Rosa Vandis tabata Sueny Felicia di 3-2 i pa Vipers Lisandra Ursulita di 2-1. Tabatin un homerun den tereno di Surivienska Wawoe.
Den último wega Pichingolo a bin fuerte pa blackout Eagles Softex 17- 0. Pa Pichingolo 17 kareda 13 hit i 0 eror. Pa Eagles Softex 0 kareda 3 hit 3 eror. Picher ganadó a resultá Arnalda Margarita, picher perdedó Shurdenay Obispo. Mihó bateadó pa Pichingolo Nissan tabata Charitey Nepunucemo i Abigail Dall di 2-2 i pa Eagles Softex Tanisha Gil, Loeyendra Valentijn i Jeamine Pieternella tur di 1-1.