FEBEKO: “TA KONTINUÁ KU E PARTIDO DEN DESIMO INNING EMPATA NA SERO …..”

WILLEMSTAD — BBC Sta. Rosa Indians a entregá riba djaluna 12 di sèptèmber último un protesta kontra di e desishon ku kuerpo di umpire a tuma pa apliká e asina yamá ‘tie break rule’ durante di e enkuentro di djadumingu dia 11 di sèptèmber último entre BBC Sta. Rosa Indians i BBC Wild Cats. Direktiva a someté e protesta aki na huisio di e Komishon di Protesta. Konklushon di Komishon di Protesta ta ku kuerpo di umpire a kometé un eror i ku e eror aki mester keda koregí.  Esaki dor di hunga e partido di djadumingu 11 di sèptèmber último di nobo kuminsando den kabes di entrada number 10. Pues na momentu ku eróneamente a apliká e ‘tie break rule’. E partido lo keda reanudá riba djadumingu 18 di sèptèmber próksimo pa 10:30. Esaki si resultá nesesario. E serie di playoff entre e dos ekiponan ta kontinuá awe nochi 13 di sèptèmber ku e serie empatá na un (1-1).

DESHONESTIDAT DI KUERPO DEN UMPIRE NO TA ASEPTABEL

Direktiva di FEBEKO ta lamentá i ta desaprobá e echo ku Umpire and Scorer Association Curaçao (USAC) a konsiderá nesesario pa duna deklarashonnan públiko engañoso den sentido ku ta direktiva di FEBEKO lo a lubidá di notifiká umpirenan di kambio di regla i ku ta esei ta e motibu ku umpirenan a apliká e regla di ‘tie break’ durante di playoff siendo reglanan di FEBEKO ta bisa lo kontrario. Ironia ta ku ta trata di un regla ku Reunion General di FEBEKO a fiha kasi 5 aña pasá (9 di novèmber 2011) na momentu ku tantu srs. Hensly Benito komo sr. Kenneth Pieter tabata miembro di direktiva di FEBEKO. Awendia ámbos ta miembro di direktiva di USAC.

No ta kustumber di e direktiva aktual di FEBEKO pa reakshoná riba tipo di insinuashon manera esaki.  Sinembargo, no ta aseptabel pa un entidat ku su balor prinsipal ta integridat ta permití su dirigentenan hustamente rekurí na deshonestidat pa trata na tapa nan fayo òf pa trata na hinka direktiva di FEBEKO den lus negativo. Direktiva di FEBEKO ta karga e speransa ku demas miembronan di USAC lo sa di tuma e pasonan nesesario pa garantisá un kuerpo di umpire i scorer konsistiendo di hendenan honesto.