WILLEMSTAD — Manera ya ta konosí, nos selekshon nashonal a klasifiká invikto pa e terser buèlta di Scotiabank Caribbean Cup na yüni último. Nos a kaba na kabes di nos pul i huntu ku Jamaica, Trinidat i Haiti nos ta forma e 4 kabesante nan di e pulnan. Nos pul, kual ta pul 4, ta konsistí di e siguiente paisnan; Antigua & Barbuda, Puerto Rico i Kòrsou.
Awor aki nos selekshon nashonal tin partidonan sumamente importante na kaminda durante e terser buèlta di e Scotiabank Caribbean Cup. Si nos sali number un di nos pul, nos lo klasifiká direktamente pa Gold Cup ku por wòrdu konsiderá manera Euro Cup òf Kopa Amerika pero pa Karibe, Norte i Sentro Amerika. E final di Scotiabank Caribbean Cup lo tuma lugá na komienso di yuni 2017. Gold Cup 2017 lo tuma lugá den luna di yüli na Merka i esaki ta un evento grandi ku lo konta ku kobertura mundial di televishon. Si nos sali viktorioso, esaki lo ta e promé biaha ku nos lo klasifiká pa Gold Cup.
P’esei djarason 5 di òktober kontra di Antigua & Barbuda aki na Kòrsou, nos ta spera un yeno kompleto di nos pueblo pa bin apoya i sostene nos muchanan. E segundo partido lo tuma lugá djamars 11 òktober na Puerto Rico kontra Puerto Rico. Nos selekshon mes lo yega Kòrsou djaluna 3 dia òktober pa nos promé kompromiso dia 5 di òktober próksimo.
Manera tur hende sa, Sr. Patrick Kluivert a despedí na yüni ùltimo komo entrenadó di nos selekshon i awor e ta fungi komo direktor tékniko di e prestigioso klup di Fransia, Paris Saint-Germain. Manera nos a bisa anteriormente Sr. Patrick Kluivert lo keda ku lasonan estrecho ku nos selekshon i lo fungi komo ambasador di nos selekshon. Tambe e lo duna konseho kaminda esei ta posibel.
Den konsulta ku Sr. Kluivert i nos direktor tékniko, Sr. Etiënne Siliëe, direktiva di FFK a nombra Sr. Remko Bicentini komo e entrenadó nobo di nos selekshon nashonal. Sr. Remko Bicentini no ta un deskonosí i a fungi den pasado kaba komo entrenadó asistente di nos selekshon nashonal.
Nos ta deseá Sr. Remko Bicentini tur klase di éksito den su funshon nobo komo direktor tékniko di nos selekshon nashonal.
Den kuadro di esaki, djaweps promé di sèptèmber binidero e lo fungi komo entrenadó di nos selekshon nashonal durante un wega di training kontra Achilles’29 un ekipo di e liga Jupiter di Hulanda.