WILLEMSTAD — Manera ta ampliamente konosí, aña pasá a presentá problema ku e kalidat di awa na nos pisina na SDK, motibu pa kua el a keda será ku tur e konskuenshanan konosí.
FDDK semper ke garantisá un produkto riba un nivel ekselente pa pueblo di Kòrsou, i pa hasi esaki posibel, ta trahando riba perfekshon di su servisio- i produktonan. For di aña pasá òktober, a bin ta hasi diferente ehersisio huntu ku profeshnalnan pa por garantisá ku e awa na Pisina Bennie Leito ta kumpli ku e normanan stipulá.
T’asina ku tur luna ta laga tèst e awa na laboratorio ADC pa por tin kòntròl riba su kalidat.
Resientemente FDDK a atkerí mashinnan pa internamente, riba un base mas regular, por midi e kalidat di awa. Personal a risibí entrenamentu dor di un profeshonal di kalidat di awa, ‘Watermanagement Expert’, sra. Janine Eurelia kon pa traha ku e mashinnan.