Sheadion Jamanika ta risibí scholarship di Western Oklahoma State College

WILLEMSTAD — Curacao Baseball City Foundation (CBCF) kièr a partisipá na pueblo di Kòrsou ku un di nos hóbennan ku talento ku yama Sheadion Jamanika, Shortstop Prospekto di apenas 18 aña di edat, a logra un baseball scholarship pa bai studia na Western Oklahoma State College na Oklahoma USA.

Sheadion ta un hóben ehemplar ku a studia i hunga beisbòl na Hulanda i a partisipa den diferente torneonan internashonal huntu ku Nederlandse Team AA.

Sheadion a militá den e ekiponan manera Neptunus (Traidens), Hawks, Groot Kwartier Stars Hubenil i Doble A. Tambe ela hunga den selekshon di Hulanda (Big League) na South Carolina.

Sheadion ta konosí pa su bon wante den Shortstop i tambe su hugadanan sensashonal den e posishon aki di shortstop.

Por medio di e programa di Player Development Program, dirigí pa Sr. Chairon Isenia, Sheadion a bin Kòrsou I mesora a wòrdu inkorporá den e programa pa prepará pa e siguiente nivel ku ta College Baseball of Profeshonal Baseball.

Despues di 3 luna di preparashon i despues di vários evaluashon, Sheadion a bin logra su beka di studio pa studia I hunga beisbòl na Merka.

Sheadion aparte di ta un bon pelotero, su disiplina, rèspèt I su edukashon tabata lokual ku mas a sobresali durante di e periodo di preparashon, i esakinan tabata un Bonus pa Sheadion sigui pa e next level.

Curacao Baseball City Foundation kièr a yama danki na tur sponsor ku di un manera of otro a sa di sostené e hóben aki, pa asina e por kontinuá su kareda di studio na Merka.

Por sierto Sheadion ta subrino di Mario Mujica (ex-Pitcher di Groot Kwartier Stars I Royal Scorpions) i nieto di defuntu Irma Mujica Ferdinandus, kual ta un persona ku semper bai a yuda den beisbòl di Pre-Infantil.