Remko Bicentini, Rihairo Meulens i Partido di Fogeo pa Selekshon di Futbol di Korsou

WILLEMSTAD — Manera ta konosí Patrick Kluivert ya no ta na kabes di e selekshon nashonal di futbòl di Kòrsou. Sin embargo, for di 7 di yüni ku Patrick a maneha su último partido te ku dia di awe no ta konosí ken lo remplas’e. Segun fuentenan hopi yega na Federashon Futbòl Kòrsou, Remko Bicentini lo bira e siguiente direktor tékniko pa e selekshon nashonal di Kòrsou. Anteriormente Remko tabata asistente di Patrick Kluivert i tabata na kabes di e selekshon ora Patrick mes no tabata presente.

Banda di Bicenti, Rihairo Meulens lo ta bek ku e selekshon di Kòrsou. Meulens no a forma parti di e selekshon di Kòrsou den e último buèlta di e segunda buèlta di e eliminatorionan di Kopa Karibe 2017 pa motibu di leshon. Meulens ya ta kompletamente rekuperá di su leshon i tambe ta militando ku e ekipo di FC Volendam den Liga Jupiler (Eerste Divisie).

Segun informashon, e selekshon di Kòrsou lo hunga un partido di fogeo dia promé di sèptèmber próksimo na Hulanda kontra e ekipo Achilles ’29. E partido aki ta programa pa tuma lugá 4’or di atardi ora lokal di Hulanda.

Tin un kantidat di hungadó ku e keda yama pa e partido di fogeo aki, pero no ta sigur ku tur lo por ta presente teniendo na kuenta ku nan tin kompromiso ku nan respektivo ekiponan.