Douglas Direktor Tekniko Deportivo Carifta 2017

WILLEMSTAD — Komo preparashon pa Carifta Games 2017, e komité organisadó “Stichting Organisatie Atletiek Evenementen” (StOA), ta organisando diferente reunion ku e gruponan di tarea asigná. Djasabra último, 20 di ougùstùs, e eks atleta olímpiko Caimin Douglas, kende ta e Direktor tékniko deportivo pa CARIFTA 2017, a duna un presentashon na e demas gruponan di tarea.

For di algun luna atras e fundashon organisadó StOA a asigná señor Caimin Douglas komo e persona responsabel pa henter e parti tékniko deportivo pa loke ta e weganan ku ta tuma lugá den SDK, kual ta enserá e programa pa e diferente disiplinanan, huradonan, e boluntarionan riba pista di atletismo i e kordinashon pa tur evento start na ora.

Señor Douglas a enfatisá ku pa logra un evenementu di atletismo eksitoso, bo mester di un grupo grandi di boluntario. Esakinan ta sumamente nesesario i importante den henter e proseso di un evento, tantu pa e preparashon promé, durante i na final di kada evento i guiando e atletanan den e proseso pa bin i bai na e respektivo akomodashonnan deportivo. “Ta sumamente importante aworakí, pa mas pronto posibel, buska un grupo di boluntario entusiasmá ku lo ser entrená riba sierto spesialidat spesífiko. Mester di diferente miembronan di hurado pa e disiplinanan di sprent, bulamentu haltu, bulamentu leu, tiramentu di sper, tiramentu di disko i pushamentu di bala. Banda di esaki mester di boluntarionan ku ta avisá e atletanan pa ta na ora na e respektivo disiplina ku nan mester kompetí na dje”, Segun Caimin Douglas a sigui enfatisá.

E inskripshon pa boluntarionan i patrosinadornan pa e ‘Carifta Games 2017’ ya a habri i por hasi esaki via e wèpsait di e organisashon (www.carifta2017.com). E komité organisadó ta hasi un yamada na un i tur ku di bèrdat ta interesá pa duna un man, pa inskribí mas pronto posibel i asina duna un sosten na e weganan. Carifta Games 2017 lo tuma lugá e fin di siman di Pasku di resurekshon den Sentro Deportivo Kòrsou (SDK) na Kòrsou.

Carifta games” ya pa años ta ser konsiderá komo e kuna di e futuro kampionnan olímpiko di e aria di Karibe. Un ehèmpel klásiko di esaki ta e atleta Usain Bolt, ku te ainda, ta esun ku tin e rèkert riba 200 meter den Carifta Games. Un kantidat promedio di 450 atleta, prosedente di e area di Karibe, ta partisipá anualmente na e weganan aki.