WILLEMSTAD — Direktiva di Swim Club Orca Curaçao ta partisipá ku djasabra dia 03 di sèptèmber 2016 lo kuminsá ku kurso pa muchanan di 3 i 4 aña familiarisa (kustumá) ku awa. E kurso lo tin un durashon di tres (3) luna i dos (2) biaha pa siman tin treinen. Riba djasabra treinen ta di 16:00 or pa 17:00 or i djadumingu treinen ta di 10:00 or pa 11:00 or na Pisina Bennie Leito.
Meta di e kurso aki ta pa e muchanan di 3 i 4 aña familiarisá/kustumá ku awa, di moda ku nan por manehá fásil den awa. Ora nan tin 5 aña nan por partisipá na e kurso pa diploma “A” sin problema. Na final di e kurso lo tin un tèst i e muchanan ku partisipá na e tèst lo risibí un sertifikado.
Kabando e kurso aki no ta nifiká ku e mucha sa landa, sino ku e por defendé su mes. Semper e mester tin un “gordel” bistí i e mester ta huntu ku su mayor ora e ta na kantu òf den un pisina òf laman. E kurso ta kosta fl. 150,00.
Pa inskripshon i mas informashon tokante e kurso aki por yama sr. Vernon Toré na telefòn 529-6586.
Swim Club Orca Curaçao ta un klup di landamentu ku ta brinda e siguiente disiplinanan:
- Landamentu kompetitivo; (“Speed zwemmen”)
- Landamentu rekreativo; (trein pa tene kurpa den kondishon i distraishon)
- Waterpolo; (“polo aquatico”)
- Landamentu sinkronisá; (“waterballet”)
- “Open waters”; (kompetí riba distansia largu den laman)
- “Master”; (treinen pa kondishon pa adulto)
Pa tur hóben ku ta interesá, Swim Club Orca Curaçao ta trein:
Djasabra di 15.30 or pa 17.00 or i djadumingu di 10.00 or pa 11.30 or na Pisina Bennie Leito.
Kontribushon ta Naf. 35,00 pa luna pa trein dos (2) biaha pa siman.
Tin treinen pa adulto tambe riba djasabra di 17.00 or pa 18.00 or i djamars di 19.30 or pa 20.30 or na Pisina Bennie Leito. Kontribushon ta Naf. 50,00 pa luna pa trein dos (2) biaha pa siman.
Pa mas informashon por yama tel: 529 6586, Vernon Toré.