WILLEMSTAD — E evento deportivo CARIFTA GAMES 2017 ta tuma lugá otro aña na Kòrsou i ta wòrdu organisá dor di e fundashon Stichting Organisatie Atletiek Evenementen (StOA). Anualmente e kompetensia regional aki ta tuma lugá den e wikènt di Pasku di resurekshon, riba un di e islanan den Karibe kaminda otro aña Kòrsou lo toka turno di esaki.
E evento ta un kampeonato di atletismo, ku a wòrdu lanta pa fortifiká e relashon entre e islanan karibense, habla ingles. Despues ela wòrdu amplia na esunnan habla franses i hulandes. Jamaica ta e pais ku mas tantu medaya, i te ku e dia di awe Usain Bolt tin e rekòr riba 200 meter. Kòrsou te ainda a logra di gana 1 medaya di plata i 3 di bròns.
E evento ta dura tres dia i tin sigur 150 evento, kaminda tin dos kategoria pa mucha hòmber i mucha muhé: U17 i U20.
Federashon di atletismo (C.A.B) i StOA ta preparando for di aña 2015 i ta orguyoso di por partisipá ku e preparashonnan ta kanando satisfaktorio. Durante e dianan 15,16 i 17 de apreel 2017 Kòrsou ta e sede di e evento aki. “E progreso di e preparashonnan ta positivo, espesialmente mirando e gran kantidat di hende i kompania ku a mustra interes di sostené e evento aki”, segun presidente di StOA, señor Igor Cyntje. “Nos ke gradisí tur hende ku ya kaba ta yudando nos ku e preparashonnan di e e organisashon”.
E preparashonnan na e momentu aki ta trata e akomodashon, sponsoring, komunikashon, buskamentu di boluntario i tur sobra pa tin un organisashon optimal pa e atletanan prometedor di region, i tambe di nos mes lokal.
E CARIFTA Games ta hunga un ròl esensial den e desaroyo di atletismo, e madre di deporte. Fuera di e interakshon sosial, hóben tambe ta krea un pashon pa edukashon físiko, i prestashon riba nivel deportivo. Edukashon i formashon ta metanan duradero ku deporte por duna hóben pa nan futuro.
Mirando e popularidat regional di CARIFTA GAMES, por antisipá riba un empuhe positivo di nos ekonomia i tambe imágen den Caribe. Gobièrnu ya kaba a duna di konosé di ta para tras di e evento aki. Kompanianan tambe a wòrdu aserka pa nan sosten na e evento aki. Pa ku esaki, tin diferente pakete di patrosinador ku eksposure tantu lokal komo regional. Kompanianan ku interes por manda un e-mail na marketing@carifta2017.com.