WILLEMSTAD — Tabata den oranan di ayera atardi ku e hóben futbolista di e ekipo PSV di Eredivisie i miembro tambe di e selekshon nashonal di futbòl Hulandes, a hasi entrega di diferente material di futbòl na e aktual ekipo kampion di futbòl lokal Centro Dominguito.
Manera ta konosí, ya pa algun tempu kaba e hóben futbolista Jetro Willems ta hasiendo diferente donashon rònt Kòrsou. E aña aki tampoko no ta otro i ayera den oranan di atardi, na e lokalidat Bean Berry, situá na Oude Caracasbaaiweg, a toka turno na e organisashon di futbol Centro Dominguito, pa risibí algun material deportivo (diferente modèl di flanè, polo, trainingspak, shòrt, mea i bala). E miembro di direktiva Roderick Volk i e hungado Germaine Geerman, tabata esnan presente, pa asina, na nòmber di Centro Dominguito, risibí e materialnan di super bon kalidat aki na man di Jetro Willems.
Señor Volk a gradisí Jetro Willems ku di un forma spontanio a hasi e donashon aki na e ekipo di Centro. Sr Volk a splika ku no ta fásil pa haña material deportivo sin e fondo nesesario i ku e materialnan aki sigur a yega na un momentu di nesesidat. Sr. Volk a splika ku sigur e ekipo di Centro Dominguito lo sa di hasi bon uzo di e material risibí aki i ta gradisí Jetro pa e bunita gesto aki..
Jetro Willems di su parti a duna di konosé ku pe ta un honor di por a hasi un gesto di gratitut pa su kompañeronan ku ta praktiká futbòl na Kòrsou. Jetro a gradisí e ekipo di Centro di a aseptá e donashon i a deklará di ta super kontentu di por koperá ku e futbolistanan di Kòrsou. Jetro a deklará ku e semper ta kòrda riba su dushi Kòrsou i semper ta trata su hendenan ku rèspèt i ta kere ku nos tur mester duna rèspèt na otro sin wak niun klase di diferensia.
Jetro ku aktualmente ta na Kòrsou e dianan aki ku vakashon tin algun proyekto di donashon mas pendiente. Entre otro e ekipo di Vesta tambe ta riba e lista pa risibí algun material, pero ora ku ta asina leu lo anunsiá esaki tambe. Jetro no ta un persona ku ta papia masha, pero ta preferá di hasi ku echonan.
Jetro un biaha mas ta gradisí e pueblo di Kòrsou ku semper ta risibié ku brasa habri i ta primintí di semper karga su bandera di Kòrsou ku honor na tur okashon.