WILLEMSTAD — Manera ya ta konosí nos selekshon nashonal a klasifiká pa e segundo buèlta di Scotiabank Caribbean Cup i preparashonnan a kuminsá pa loke ta trata e 2 kompromisonan di nos selekshon nashonal.
Nos promé partido lo ta kontra Guyana Ingles djárason, promé di yüni miéntras djamars 7 di yüni nos lo enfrentá U.S. Virgin Islands. Ámbos partido lo tuma lugá aki na Kòrsou den Stadion Ergilio Hato (SDK) pa 8’or di anochi.
Despues di e partido amistoso di nos selekshon nashonal kontra e ekipo kampion di Terser Divishon aya na Hulanda, R.K.V.V. Westlandia ku a terminá ku un empate di 2 gol, nos hungadónan residensia aya na Hulanda lo yega Kòrsou den e wikènt di 27 di mei pa asina djòin nos hungadónan lokal i sigui ku e training nan pa nos 2 kompromisonan den e segundo buèlta di Scotiabank Caribbean Cup 2016.
Portanan ta habri for di 5’or di atardi i nos ta rekomendá tur hende pa yega trempan pa evitá e tráfiko mirando ku tin konstrukshonnan ta tumando lugá riba e kaminda.
E úniko entrada pa e personanan ku a kumpra e sekshon VIP ta via di Gosieweg. Mester pasa den banda di e barikada nan, pasa dilanti Hot Wings Café, Robbie’s Lottery etc, subi e área di parkeo di e skol Emmanuel pa stashoná.
Pa e personanan ku e otro diferente sekshonnan tin 2 opshon. E promé ta via di Kaya Thomas Henriquez (e hanchi di ABVO), lora na man robes pa despues subi Kaya Andrew Jones pa despues subi e área di parkeo di Stadion Ergilio Hato.
Tambe por pasa via di Gosieweg manera e sekshon di VIP, pasa den banda di e barikada nan, pasa dilanti Hot Wings Café, Robbie’s Lottery etc, kita na bo man robes, despues di e trùk di pan i subi un kaminda di tera sigui bin patras i lora dilanti di e porta na e pisina i subi e área di parkeo di Stadion Ergilio Hato.
Karchinan pa e 2 partidonan aki ya ta na benta i ta optenibel na FFK bou di ora di ofisina, Botika Mampuritu, Beep Beep, 4th of July Snèk na Barber, pòmp di gasolin Santa Maria i na tur filial di C-Post N.V.
E preisnan pa e diferente paketenan (di ámbos partido) pa sekshonnan ta lo siguiente:
- VIP ta kosta Fl.300,- (inkluso konsumo);
- Bou di tribuna kubrí ta Fl.75,-
- Bou di tribuna kubrí parti Festival Center ta Fl.50,-
- Tribuna no kubrí ta Fl.30,-
- Den e sekshon di tribuna no kubrí mucha te ku 12 aña i 60+ ta paga Fl.20,-
Tene na kuenta ku e preisnan aki ta bálido pa ámbos partido, pues bo ta kumpra un pakete di karchi pa tur e 2 partidonan aki!
Ainda tin mas suèter di nos selekshon nashonal ku shal optenibel na FFK bou di ora di ofisina na balor di 35 ku 25 florin. Pasa buska di bo pa asina bo bin sostené i apoyá nos hungadónan.